Mən - Şirinova Günay Yaşar qızı Daşkəsən rayon Muşavaq kənd Hikmət Məmmədov adına ümumi orta məktəbdə tarix müəllimi kimi fəaliyyət göstərirəm.

Dərslərimi müzakirə formasında şagirdlərimin maraqlarına uyğun qurmağa çalışıram.
Mənim üçün deyə bilərəm ki, bütün dərslərim maraqlı və keyfiyyətli keçir. Çünki şagirdlərimə öz fənnimi sevdirməyi bacarmışam və mən deyə bilərəm ki, ilk olaraq özümü, daha sonra fənnimi sevdirmişəm. Əgər şagird müəllimi sevməzsə, onun tədris etdiyi fənni də sevə bilməz.
Hər bir şagird mənim üçün özəl və dəyərlidir. Şagirdlərim arasında heç zaman fərq qoymuram. Mən Daşkəsən rayon Yuxarı Daşkəsən qəsəbə Zahir Bağırov adına tam orta məktəbdə fəaliyyət göstərərkən fiziki məhdudiyyətli bir şagirdim vardı. Onunla keçdiyimiz dərs deyə bilərəm ki, bir başqa maraqlı olurdu. Çünki Tofiq həm fiziki, həm də nitqində qüsuru var idi. Mən onunla fərdi evdə məşğul olurdum. Tofiq bütün bunlara baxmayaraq, cox həvəslə dərslərini oxuyurdu. Tarix fənnindən çətin adlar olmasına baxmayaraq, onları asanlıqla yadda saxlayırdı. Biz müəllimlər Tofiq üçün təkərli araba alıb hədiyyə etdik ki, ən azından özü tək qalan zamanlarda evdən həyətə çıxa bilsin.

Bütün şagirdlərin tarix fənninə marağı olmaya bilər. Onlarda maraq oyatmaq, bu fənni sevdirmək üçün bilik yarışları, debatlar təşkil edir və qalib komanda və yaxud şagirdi diplomla təltif edirəm. Bu yolla şagirddə öz fənnimə qarşı maraq oyada bilirəm .
Dərs dediyim məktəbdə rastlaşdığım çətinlik qarlı və yağışlı havada, ilk olaraq, yolun çətinliyi ilə bağlıdır. Daha sonra məktəbimizdə İKT çatışmazlıqları var. Lakin bütün bunlara baxmayaraq, biz müəllim və şagirdlər məktəbə həvəslə gedir və həvəslə şagirdlərimizi öyrədirik.
Şəhər yerində təhsil alan şagird kənd yerində təhsil alan şagirddən heç də üstün deyil. Şagirdlərimin təmiz sevgisi mənim həvəs mənbəyimdir. Onların ilk açan bənövşə, nərgiz, yasəmən gülünü həvəslə dərib: "Müəllim, bunu sizə gətirmişəm" - deməsi mənim üçün çox sevindirici haldır. Şagirdlərimin diqqəti müəllim olmağımın qürurunu yaşadır mənə.

Şagirdlərimiz kənd məktəbində təhsil alır və onlardan IX sinif şagirdi Musayeva Nərmin Şamil qızı bu il "Şuşa ili" ilə bağlı rəsm müsabiqəsinə aid rəsm əsəri çəkdi və Nərminin çəkdiyi rəsm həvəsləndirici yerə layiq görülüb Bakıda diplomla təltif edildi.
Niyə məhz müəllim olduğuma gəlsək...
Bu sənət ailədən gəlir, ilk sinif müəllimim nənəm Aliyeva Elmira olub, Azərbaycan dili və ədəbiyyat müəllimim babam Şirinov Seyfəddin olub. Atam GÇQH müəllimi kimi fəaliyyət göstərir. Məhz tarix müəllimi olmağımın səbəbkarı öz müəllimim Firdovsi müəllimdir, o sevdirib bu fənni mənə. Mənim arzumdur ki, gələcəkdə hər hansı bir şagirdim desin ki, mənə tarix fənnini Günay müəllim sevdirib və ona görə məhz bu fənni seçmişəm. Müəllimlik müqəddəs sənətdir. Bu elə bir peşədir ki, öz yetirmələrinlə hər yanda, hər sahədə qarşılaşa bilirsən. Mən öz peşəmi və şagirdlərimi sevən, peşəsinin vurğunu bir müəlliməm.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link: https://ref.az/2r2ho8w