AGMA komandası olaraq uğurlu işlərimiz davam edir, yeni əməkdaşlıqlarımız güclənir. 

Azərbaycan Təhsil İşçiləri Azad Həmkarlar İttifaqı ilə birgə əməkdaşlığımızın gənc müəllimlərin təcrübəsinin, bilik və bacarıqlarının artmasında mühüm rolu olacaqdır.

Dəvətə görə təşəkkür edirik. 

Region koordinatorların seçimi üçün test imtahan mərhələsi keçirilib.

Qeyd edək ki, növbəti mərhələdə imtahandan uğurla keçmiş müəllimlərin müsahibə mərhələsi baş tutacaq.

Fevralın 15-də Azərbaycan Gənc Müəllimlər Assosiasiyasının (AGMA) təşkilatçılığı ilə "Gənc Müəllimlərin IV Şəbəkələşmə Forumu" keçirilib.

600-dən çox müəllimin iştirak etdiyi forumda əvvəlcə Dövlət Himni səsləndirilib, ardınca şəhidlərimizin xatirəsi bir dəqiqəlik sükutla yad olunub.

Açılış nitqi ilə çıxış edən AGMA-nın sədri Pərvinə Qədimova forumun məqsəd və əhəmiyyəti barədə iştirakçılara məlumat verib.

Daha sonra tədbirin rəsmi hissəsinə start verilib. Azərbaycan Respublikasının Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdiri Səbuhi Rzayev, Milli Məclisin deputatı Ceyhun Məmmədov çıxış edərək mövzunun təhsil sistemi üçün əhəmiyyətindən, son dövrlərdə görülən işlərdən danışıblar. Təhsil Sisteminin İnformasiyalaşdırılması İdarəsinin rəisi Vüsal Xanlarov çıxış edərək "Rəqəmsal Məktəb" platforması haqqında məlumat verib. Digər çıxışçılardan Azərkosmosun Coğrafi informasiya sistemləri departamentinin Süni intellekt bölməsinin rəhbəri Həmid Əskərov, İnnovasiya və Rəqəmsal İnkişaf Agentliyi, Rəqəmsal məhsulların inkişafı departamentinin baş məhsul meneceri Tural Həsənov çıxış edərək gənc müəllimlərimizin “Süni intellektin təhsildə tətbiqi” mövzusunda maarifləndirilməsinin olduqca məqsədəuyğun və vacib olduğunu vurğulayıb.  

Daha sonra tədbirin bədii hissəsinə start verilib. Belə ki Azərbaycan Milli Konservatoriyasının və Bakı Musiqi Akademiyasının tələbələri "Qəlbimin səsi", "Çardaş" və "Odlar Yurdu" əsərləri ilə bədii hissəyə rəng qatıblar.

Tədbirin rəsmi hissəsi yekunlaşdıqdan sonra forumun panel müzakirəsi başlayıb. ADA Universiteti, İnformasiya Texnologiyaları və Mühəndislik Məktəbinin müəllimi İsmayıl Şahəliyev moderatoruluğu ilə AzTU, Təhsildə İnformasiya Texnologiyaları və Metodik Dəstək İnstitutunun direktoru Etibar Seyidzadə, ADA Universiteti, İnformasiya Texnologiyaları və Mühəndislik Məktəbinin dekanı Abzetdin Adamov və ADNSU nəzdində Azərbaycan Fransız Universitetinin İT mütəxəssisi Pərviz Nəsirov  “Süni intellekt və etika: Təhsildə dürüstlük və məxfilik məsələləri” adlı mövzusunda çıxış edərək müəllimləri maraqlandıran sualları cavablandırıblar.

Forumun irəliləyən dəqiqələrində 2-ci panel başlayıb. Dördüncü Sənaye İnqilabının Təhlili və Koordinasiya Mərkəzinin Rəqəmsal iqtisadiyyat şöbəsinin mütəxəssisi Sadiq Şahbazov moderatorluğu ilə Dördüncü Sənaye İnqilabının Təhlili və Koordinasiya Mərkəzi, Layihələrin idarəolunması şöbəsinin rəhbəri Gülminə Məlikzadə, Qarabağ Universitetinin baş müəllimi, Redmenta təhsil eksperti və intruksiyonal dizayner Orxan Abdullayev və AILAB-ın vençur meneceri Şahin Abdurəhimov “Rəqəmsal resurslar və süni intellekt: Effektiv təhsil platformalarının inkişafı” adlı mövzuda çıxış edərək müəllimləri maraqlandıran sualları cavablandırıblar.

Daha sonra Azərbaycan Gənc Müəllimlər Assosiasiyasının Birlik rəhbərləri tərəfindən fənn müəllimləri üçün müxtəlif otaqlarda praktik məşğələlər keçirilib. Sonda AGMA-nın fəal üzvləri təltifnamə ilə təltif ediliblər və bununla da konfrans işini yekunlaşdırıb.

Sumqayıt Dövlət Universitetində (SDU) Azərbaycan Gənc Müəllimlər Assosiasiyası (AGMA) tərəfindən gənc müəllim və tələbələr üçün görüş keçirilib. 

Universitetin Sosial məsələlər və ictimaiyyətlə əlaqələr üzrə prorektoru, dosent Elmar Xəlilov çıxış edərək görüşün əhəmiyyətindən və Azərbaycan Gənc Müəllimlər Assosiasiyası tərəfindən həyata keçirilən layihələrdən bəhs edib.

Gələcəyin müəllimləri olan tələbələrə bu imkanlardan faydalanmağı tövsiyə edib. Görüş zamanı AGMA-nın sədri Pərvinə Qədimova çıxış edərək gənc müəllim və tələbələrə təşkilatın fəaliyyəti, imkanları, gələcək planları ilə bağlı ətraflı məlumat verib. Pərvinə xanım iştirakçılara müxtəlif layihələrdən, təlimlərdən necə yararlana biləcəkləri barədə danışıb.

Sizi 31 Dekabr − Dünya Azərbaycanlılarının Həmrəyliyi Günü münasibətilə təbrik edirik!

Azərbaycanda Gənc Müəllimlərin 73%-lik Uğur Nəticəsi!

Azərbaycan Respublikası Elm və Təhsil Nazirliyi ilə birgə həyata keçirilən təlimlər çərçivəsində Azərbaycan Gənc Müəllimlər Assosiasiyası üzvü olan müəllimlər beynəlxalq imtahanlarda yüksək ballar toplayaraq böyük uğur qazandılar!

2023-2024-cü illər ərzində 222 AGMA üzvü ITE tərəfindən təşkil olunan təlimlərdə iştirak etmişdir. Onlardan 163 nəfər beynəlxalq sertifikatlı mütəxəssis adına layiq görülmüşdür.

 Müəllimlərimiz ITE-nin “Certiport” və “ICDL” test mərkəzlərində bilik və bacarıqlarını nümayiş etdirərək qlobal səviyyədə tanınan sertifikatlar əldə etdilər. Bu nailiyyətlər onların pedaqoji fəaliyyətinə yeni perspektivlər gətirir.

İmtahanlar 3 əsas istiqamət üzrə keçirilib:

“Microsoft Sertifikatlı Pedaqoq” (MCE);

“ICDL Kompüter və Onlayn Əsaslar”;

“ICDL Komanda İşi.”

 Gələcək fəaliyyətlərinizdə sizə uğurlar arzu edirik!

Azərbaycan Gənc Müəllimlər Assosiasiyasının AzEdu Azərbaycan Təhsil Portalı ilə birgə təşkilatçılığı və Naxçıvan Muxtar Respublikasının Təhsil Nazirliyinin tərəfdaşlığı ilə Naxçıvan şəhərində “Pedaqoji Həmrəylik: Təcrübədən Gələcəyə” adlı konfrans keçirilib.

Konfrans 21 dekabr 2024-cü il tarixində Naxçıvan Dövlət Universiteti nəzdində fəaliyyət göstərən Gimnaziyada təşkil edilib.

Konfransın məqsədi təcrübə və yenilik arasındakı tarazlığı təşviq etməkdir. Bu gün gənclərin təcrübəli insanların biliklərindən bəhrələnərək yenilikçi texnologiyaların və ideyaların tətbiqində daha böyük nailiyyətlər əldə etməsi əsas inkişaf istiqamətlərindən biri kimi dəyərləndirilir. Eyni zamanda, təcrübəli şəxslərin də gənclərin enerjisindən və yenilikçi baxışlarından ilhamlanaraq öz biliklərini yeni dövrün tələblərinə uyğun inkişaf etdirmələri üçün şərait yaradılması vacibdir. Bu yanaşma pedaqoji həmrəyliyin möhkəmləndirilməsi və müasir təhsil metodlarının daha geniş tətbiqi baxımından mühüm əhəmiyyət kəsb edir.

Tədbir təntənəli şəkildə başlayıb. Belə ki, yüksək vəzifəli şəxslər – Naxçıvan Muxtar Respublikasının təhsil naziri Elxan Nəcəfov və Azərbaycan Respublikası Milli Məclisinin deputatı, Milli Məclisin İctimai birliklər və dini qurumlar komitəsinin sədri Fazil Mustafa konfransda iştirak edən öz müəllimlərinə yaxınlaşaraq onlara hörmət əlaməti olaraq gül dəstələri təqdim edərək, salamlayıblar.

Konfransın rəsmi hissəsində Azərbaycan Respublikasının Dövlət Himni səsləndirilib, ümummilli lider Heydər Əliyevin və Vətən uğrunda canını fəda edən şəhidlərin xatirəsi bir dəqiqəlik sükutla yad edilib. 

Açılış nitqini Naxçıvan Muxtar Respublikasının təhsil naziri Elxan Nəcəfov söyləyib. Nazir çıxışında təhsil sahəsindəki həmrəyliyin önəmindən danışıb.

Tədbirin digər iştirakçıları Azərbaycan Respublikası Milli Məclisinin deputatı, Milli Məclisin İctimai birliklər və dini qurumlar komitəsinin sədri Fazil Mustafa, Təhsildə Keyfiyyət Təminatı Agentliyinin İdarə Heyətinin sədri Tural Əhmədov, Azərbaycan Gənc Müəllimlər Assosiasiyasının sədri Pərvinə Qədimova və AzEdu.az təhsil portalının rəhbəri Tünzalə Abbasova nitqləri ilə çıxış ediblər.

Çıxışlarda müəllim peşəsinin cəmiyyətin inkişafındakı rolu və müasir tədris yanaşmalarının tətbiqinin əhəmiyyəti müzakirə edilib.

Naxçıvanda təşkil edilən tədbirdə rəsmi hissə başa çatdıqdan sonra Heydər Əliyev adına tam orta məktəbin və Heydər Əliyev Uşaq-Gənclər Yaradıcılıq Mərkəzinin şagirdləri tərəfindən hazırlanan bədii proqram təqdim edilib.

Tədbir Heydər Əliyev adına tam orta məktəbin şagirdləri Amil Mahmudov, Musa Babazadə və Uğur İsmayılovun “Dağların başı qışda qar olar” mahnısının ifası ilə başlayıb. İfa zamanı onlara “Xarı bülbül” ansamblı müşayiət edib. Ardınca Heydər Əliyev Uşaq-Gənclər Yaradıcılıq Mərkəzinin nağara dərnəyinin üzvləri “Azərbaycan ritmi” musiqisini təqdim ediblər.

Proqram IX b sinif şagirdi və “Xarı bülbül” ansamblının solisti Uğur İsmayılovun məktəb yoldaşları ilə birlikdə səsləndirdiyi “Bayatı-Şiraz” muğamı və rəngi ilə davam edib. Bədii hissə Heydər Əliyev Uşaq-Gənclər Yaradıcılıq Mərkəzinin rəqs dərnəyinin təqdim etdiyi “Cəngi rəqsi” ilə yekunlaşıb.

Konfransın əsas hissəsində müəllimlərin iştirakı ilə panel müzakirələri keçirilib. 

Moderator Pərvinə Qədimovanın rəhbərliyi ilə təşkil olunan müzakirələrdə bir sıra önəmli mövzulara toxunulub.

Çıxışın birinci hissəsində Rüstəmova Məlahət Oruc qızı – “Şagirdlərin dərsə cəlb edilməsi metodları”mövzusunda geniş müzakirə aparıb.

İkinci çıxışda Tarverdiyeva Gülxara Budaq qızı – “Sinfin idarə edilməsi modelləri” haqqında məruzə ilə çıxış edib.

Sonuncu çıxışda isə Məmmədova Rəxşəndə Mahmud qızı – “Zəif təhsil nəticəsi olan şagirdlərin göstəricilərinin yaxşılaşdırılması” mövzusundan danışıb.

Panel müzakirələri iştirakçılar arasında təcrübə və fikir mübadiləsi üçün geniş imkan yaradıb. Müəllimlərlə Azərbaycan Respublikası Milli Məclisinin deputatı, Milli Məclisin İctimai birliklər və dini qurumlar komitəsinin sədri Fazil Mustafa arasında keçirilən interaktiv sual-cavab sessiyası olub. Təhsil işçiləri özlərini maraqlandıran suallarla çıxış edib, müasir təhsil sisteminin inkişafı, təcrübənin tətbiqi və qanunvericilikdəki yeniliklər barədə deputatdan cavablar alıblar.

Tədbir mükafatlandırma və kollektiv xatirə fotosu ilə yekunlaşıb.

Sabunçu rayonu Rixard Zorge adına 90 nömrəli tam orta məktəbdə koordinatorlarımız Elnurə İsmayılova və Ruhanə Yaqubova tərəfindən Azərbaycan Gənc Müəllimlər Assosiasiyasının təqdimatı və "Təhsilverənlərin etik davranış Qaydaları və ünsiyyətin rolu", "Müasir dərsin quruluşu" mövzularında təlim keçirilib.