Azərbaycan Gənc Müəllimlər Assosiasiyasının təşkilatçılığı, Gənc Xarici dil Müəllimləri Birliyinin əməkdaşlığı, Bakı Slavyan Universiteti - BSU və POLYGLOT dil mərkəzinin tərəfdaşlığı ilə 28 oktyabr 2023-cü il tarixində “ Xarici dil müəllimlərinin inkişafı forumu ” həyata keçiriləcəkdir.

Formun məqsədi respublika üzrə xarici dil müəllimələrinin şəbəkələşməsini təmin etmək və gənc xarici dil müəllimlərinə təlimlərin keçirilməsidir.

Gənc müəllimlərin maariflənməsinə, özlərini inkişaf etdirməsinə, işlərini sevgi ilə görməsinə yardımçı olmaq bizim məqsədimizdir!

Qeyd: Forum Bakı şəhərində keçiriləcəkdir.

Forumda iştirak edən müəllimlərə onlayn iştirakçı sertifikatı veriləcək.

Azərbaycan dili və ədəbiyyatı müəllimlərinin I forumu 

Azərbaycan Gənc Müəllimlər Assosiasiyası və Azərbaycan Respublikası Təhsil İnstitutunun Metodik dəstək və peşəkar inkişaf mərkəzi ilə birlikdə Azərbaycan dili və ədəbiyyatı müəllimlərinin I forumunu təşkil edir.

Forumun məqsədi sertifikasiya prosesinə hazırlaşan müəllimləri məlumatlandırmaq və onlara onlayn dəstək göstərməkdən ibarətdir.

27 aprel 2023-cü il saat 20:00-da onlayn formatda keçiriləcək olan Azərbaycan dili və ədəbiyyatı müəllimlərinin iştirakı nəzərdə tutulmuş bu tədbirdə Azərbaycan dili, ədəbiyyat və ümumi kurikulum mövzularına toxunulacaqdır. Tədbir zamanı ekspertlər tərəfindən müəllimləri maraqlandıran mövzular barədə müzakirələr aparılacaq və iştirakçılar tərəfindən ünvanlanmış suallar cavablandırılacaqdır. 

Qeyd: Forumda yalnız bu il sertifikasiya imtahanında iştirak edən müəllimlər iştirak edə bilərlər.

Sertifikasiyaya dəstək marafonu "İbtidai sinif müəllimlərinin I forumu" ilə start verildi. 

Sertifikasiyaya dəstək marafonunun mentorlarını sizə təqdim edirik.

Marafonda iştirak edən hər bir müəllimə uğurlar arzulayırıq.

Sertifikasiyaya dəstək məqsədilə İbtidai Sinif Müəllimlərinin I Forumu keçirilib. 

Forum keçirildikdən sonra müəllimlər sertifikasiyaya dəstək marafonuna cəlb olunublar. 

Müəllimlər marafon çərçivəsində daha öncəki illərdə təcrübə qazanmış mentorlarla sertifikasiya prosesinə hazırlaşırlar. Marafon uğurla davam edir. 

Sertifikasiyaya dəstək marafonunun göstəricilərini sizinlə bölüşürük.

Mil-Muğan Gənc Müəllimlərinin I Regional Forumu keçirilib.

4 mart 2023-cü il tarixində Azərbaycan Gənc Müəllimlər Assosiasiyası (AGMA) və Mil - Muğan Regional Təhsil İdarəsinin birgə təşkilatçılığı ilə Sabirabad, Saatlı, İmişli və Beyləqan rayonlarının ümumi təhsil müəssisələrində çalışan gənc müəllimlər arasında davamlı əməkdaşlıq və şəbəkələşmənin təmin edilməsi üçün Mil - Muğan Gənc Müəllimlərinin I Regional Forumu keçirilib.

Tədbirdə Mil-Muğan Regional Təhsil İdarəsinin Tədrisin Keyfiyyət Sektorunun müdiri Mahir Zahidov, Azərbaycan Gənc Müəllimlər Assosiasiyasının sədri Rüfət Əsədzadə, Mil-Muğan Regional Təhsil İdarəsi Saatlı rayon Təhsil Sektorunun aparıcı məsləhətçisi Mikayıl Rüstəmov, Karnegi Klub Təlim Mərkəzinin rəhbəri, Biznes təlimçisi, NLP master Nəcəf Allahverdiyev və Sabirabad, Saatlı, İmişli, Beyləqan rayonlarında fəaliyyət göstərən gənc müəllimlər iştirak edib. 

Forumda Nəcəf Allahverdiyev “Uğurun formulu varmı?” mövzusunda çıxış edərək müəllimləri maraqlandıran sualları cavablandırıb.

Forumun keçirilməsində bizə dəstək olan Azərbaycan Respublikası Elm və Təhsil Nazirliyinə, Mil-Muğan Regional Təhsil İdarəsinə təşəkkür edirik!

“Gənc müəllimlərin III Şəbəkələşmə Forumu” keçirilib.

Azərbaycan Gənc Müəllimlər Assosiasiyasının (AGMA) təşkilatçılığı və TutorLab.az-ın tərəfdaşlığı ilə Bakı Slavyan Universitetində “Gənc müəllimlərin III Şəbəkələşmə Forumu” keçirilib. 

Forumda Bakı Şəhər Təhsil İdarəsinin müdiri Mehriban Vəliyeva, Bakı Slavyan Universitetinin rektoru Anar Nağıyev, Elm və Təhsil Nazirliyi yanında İctimai Şuranın sədri Günel Səfərova, Quba-Xaçmaz Regional Təhsil İdarəsinin müdiri Rüfət Hacıyev, TutorLab.az-ın rəhbəri Azad Manaflı,təhsil ictimaiyyətinin nümayəndələri və müəllimlər iştirak ediblər. 

Tədbir Dövlət Himninin səslənməsi, Vətən uğrunda canından keçən şəhidlərimizin və dünən Tehrandakı Səfirliyimizə qarşı törədilən terror aktının qarşısını alan zaman həlak olan baş leytenant Orxan Əsgərovun əziz xatirəsi bir dəqiqəlik sükutla yad edilməsi ilə başlayıb.

Tədbiri giriş sözü ilə açan AGMA-nın sədri Rüfət Əsədzadə Assosiasiya haqqında və onun gördüyü işlər barədə ətraflı məlumat verib.

Bakı Şəhəri üzrə Təhsil İdarəsinin müdiri Mehriban Vəliyeva son illərdə gənc müəllimlərin peşəkarlıq səviyyəsindən, ölkəmizdə təhsil sahəsində həyata keçirilən mühüm təşəbbüslərdən söhbət açıb.

Digər çıxış edənlər hər il gənc müəllimlərin sayının daha da artmasının gənclərin müəllimlik peşəsinə olan marağından xəbər verdiyini bildiriblər. Bundan əlavə, Vətən Müharibəsində qəhrəmanlıq tariximizinin yeni salnaməsini yazanlar arasında gənc müəllimlərin, həmçinin onların yetirmələrinin də olmasının qürurverici olduğunu söyləyiblər.

Azərbaycan Gənc Müəllimlər Assosiasiyasının üzvü, Şəmkir rayon Müşfiq Süleymanov adına Seyfəli kənd tam orta məktəbinin müəllimi Rəna Heydərzadə kənd məktəbində işləyən müəllimin şagirdlərə necə dəstək olduğunu bildirərək uğur hekayəsi ilə gənc müəllimlərə də motivasiya olub.

Forumda musiqiçilərin ifasında ədəbi-bədii kompozisiya nümayiş olunub.

Daha sonra Forum spikerlərin çıxışları ilə davam edib. 

Müzakirələrdə Rüfət Hacıyev “Məktəb-valideyn münasibətləri”, Bəhman Qüdsi “Müəllimin insan mühəndisliyi”, Ayaz Mirzəyev “Medianın gözündə müəllim imici”, Nəcəf Allahverdiyev “Danlayaq ya danlamayaq?” mövzuları ətrafında çıxış ediblər.

Sonda AGMA-nın kurslarında fəal iştirak edən müəllimlər təltif olunublar.

İştirak edən qonaqlarımıza, müəllimlərə, spikerlərə və Bakı Slavyan Universitetinə göstərdiyi dəstəyə görə təşəkkür edirik!

Gənc Müəllimlərin II Forumu

11 iyun 2022-ci il tarixində Azərbaycan Gənc Müəllimlər Assosiasiyasının təşkilatçılığı ilə “Gənc müəllimlərin II forumu” keçirilib. Forumda ölkəmizin bir çox bölgəsindən olan 300 nəfər gənc müəllim, dövlət rəsmiləri- Azərbaycan Respublikası təhsil naziri Emin Əmrullayev, Azərbaycan Respublikası Gənclər və İdman nazirinin müavini İndira Hacıyeva, millət vəkilləri Etibar Əliyev, Şahin İsmayılov, Azərbaycan Respublikası Təhsil İnstitutunun direktoru Rüfət Əzizov, Azərbaycan Dövlət Pedaqoji Universitetinin rektoru Cəfər Cəfərov, Gənclər Fondunun icraçı direktoru Fərid Cəfərov, Azərbaycan Respublikası Qeyri Hökumət Təşkilatlarına  Dövlət Dəstəyi Agentliyinin İcraçı direktoru Aygün Əliyeva, Amerikanın Corc Vaşinqton Universitetinin ikili diplom proqramının direktoru Tofiq Əhmədov, Dağlıq Şirvan Regional Təhsil İdarəsinin müdiri Rövşən Əliyev, təhsil ictimaiyyətinin nümayəndələri iştirak edib. 

Tədbir Azərbaycan Respublikasının Dövlət Himninin səslənməsi və Vətən uğrunda canından keçən şəhidlərimizin, 20 təhsil işçisinin əziz xatirəsini bir dəqiqəlik sükutla yad edilməsi ilə başladı.

Azərbaycan Gənc Müəllimlər Assosiasiyasının sədri Rüfət Əsədzadə Assosiasiya haqqında ətraflı məlumat vermiş və AGMA-nın fəaliyyətinə həsr olunan videoçarx nümayiş etdirilmişdir.

Tədbirdə çıxış edən Azərbaycan Respublikasının təhsil naziri Emin Əmrullayev son illərdə müəllim peşəsinə marağın artdığını, müəllimlərin peşəkarlıq səviyyəsinin yüksəldilməsi istiqamətində görülən işləri vurğulayıb, ölkəmizdə təhsil sahəsində həyata keçirilən mühüm təşəbbüslərdən bəhs edib.

Forum Azərbaycan Dövlət Mədəniyyət İncəsənət Universitetinin nəzdində fəaliyyət göstərən Cadenza Orkestrinin ifası və dəyərli spikerlərin müxtəlif məzmunda çıxışları və IV Muğam Televiziya Müsabiqəsinin qalibi Zümrüd Məmmədovanın ifası ilə davam etmişdir.

Tədbir gənc müəllimlərin çıxışları və tədris təcrübəsi ilə fərqlənən müəllimlərin təltif olunması ilə yekunlaşmışdır.

Region gənc müəllimlərinin II şəbəkələşmə forumu - Bərdə

22 may 2022-ci il tarixində Azərbaycan Gənc Müəllimlər Assosiasiyası (AGMA) region gənc müəllimlərinin yumşaq bacarıqlarının inkişaf etdirilməsi, şəbəkələşməsi, əməkdaşlığın qurulması məqsədilə Bərdə Peşə Liseyində  “Region gənc müəllimlərinin II şəbəkələşmə forumu” nu təşkil etdi.

Daha ətraflı: https://agma.az/news/298