Profil

Axtarış

Müəllimlərin tanıdılması

badge-icon
"Gənc Müəllim Danışır" rubrikamızın növbəti qonağı Şahin Səfərovdur.
Mən - Şahin Səfərov Allahverdi oğlu 1992-ci ildə  Masallı rayon Lürən kəndində anadan olmuşam. 2010-cu ildə məktəbi əla qiymətlərlə bitirərək, AMİ-nin Ağcabədi filialının Riyaziyyat və İnformatika müəllimliyinə qəbul olmuşam. 2014-cü ildə ali təhsilimi başa vurub, hərbi xidmətə yollanmışam. 2018-ci ildə MİQ imtahında uğur əldə edərək, Ağdam rayon 66 saylı köçkün tam orta məktəbində riyaziyyat fənnini tədris edirəm. İndiyə qədər intellektual, idman yarışlarında iştirak edərək diplom və fəxri fərmanla təltif olunmuşam .

Dərslərimə maraq qatmaq üçün innovativ metodlardan istifadə edir, müxtəlif bilik yarışları təşkil edirəm. Şagirdlərə stimul vermək üçün hər həftənin, ayın, ilin qaliblərini sertifikat və qiymətli hədiyyələrlə təltif edirəm.

Dərslərimizin bir-birindən maraqlı keçməsinə baxmayaraq, mənim sinif otağından çox yenilik kimi ara-sıra açıq hava şəraitində keçdiyimiz dərslər yaddaqalan olub. Yay məktəbi dərslərində dərs şagirdlər üçün daha əyləncəli olur.

İstedadlı şagirdlərimizin üzə çıxması üçün intellektual yarışlar, bilik yarışları, mütəmadi valideynlərlə söhbət əsasında şagirdlərimizi aşkar edirəm.

İstedadlı şagirdlərimiz çoxdur, biz bunları vaxtında aşkar edərək bir neçəsi ilə uğur qazanmışıq. 9-cu sinif şagirdimiz V. Xədicə bu il buraxılış imtahanında fərqlənmə şəhadətnaməsi almış, 6a sinif şagirdi Ə.Toğrulun dəfələrlə riyaziyyat üzrə Ağdamda 1-ci yeri tutmuş, Lütfizadə adına olimpiadada respublika üzrə 3-cü yerə çıxaraq diplom və medalla təltif olunmuşdur. Toğrul həmçinin beynəlxalq olimpiadada da uğurlu nəticələr əldə etmişdir.

Dərs dediyim məktəb rayon mərkəzindən 25 km uzaqlıqda yerləşsə də, hər gün bu yolu getmək məni heç yormur, çünki məni əziz şagirdlərimə olan sevgi daha da ruhlandırır. Məktəbimiz köçkün məktəbi olduğu üçün dar sinif otaqları, tam işıqlı olmayan otaqlarda dərs keçsək də biz bundan heç də sıxılmır,  şagirdlərimizin gələcəyi üçün onlara yaxşı təhsil veririk.

Kənd məktəbinin şəhərdən əsas fərqi texnologiyaların çatışmazlığıdır. Müəllimlik peşəsini ona görə seçdim ki, uşaqları öyrətmək, onlarla işləməyi sevdiyim üçün, empatiya hissi, humanistlik, öyrətmə və öyrənmə həvəsim olduğuna görə yenidən ixtisas seçimi olarsa, yenə müəllimlik peşəsini seçərdim. Nəzərə alsaq ki, Ağdam rayonu 30 il erməni təcavüzkarlarının işğalına məruz qalmışdır. Mùəllim olaraq təkcə təhsil verməklə yanaşı, şagirdlərimizə vətənpərvərlik hissi, mədəni keyfiyyətlər aşılamağa çalışıram.

Abituriyentlərə də tövsiyəm odur ki, hər zaman öz maraqlarının arxasınca getsinlər. Özlərini hansı peşədə görmək istəyirlərsə, o yolda irəliləsinlər. Sonunda mütləq öz məqsədlərinə çatacaqlar.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link: https://ref.az/2r2ho8w

20.05.2022

badge-icon
"Gənc Müəllim Danışır" rubrikamızın növbəti qonağı Zülfünaz Rüstəmlidir.
Mən - Rüstəmli Zülfünaz Asif qızı Azərbaycan dili və ədəbiyyat müəllimiyəm.
Dərslərimi hər zaman böyük həvəslə keçirəm. Dərsləri maraqlı etmək üçün şagirdlərimlə müzakirələr təşkil edir, onları müzakirəyə, bir-birlərinə sual verməyə cəlb edirəm. Bu onların biliyinin möhkəmlənməsinə daha cox kömək olur. Hər bir dərsin özünə görə marağı, keçilən mövzuya görə fərqlilik xüsusiyyətləri olur. Şagirdlərlə asudə vaxt tapdıqca söhbət edir, həm də şagirdi daha yaxından tanımış oluram.

Dərs keçdiyim bir çox istedadlı şagirdlərim var, onlar öz bacarıqları, istedadları ilə hər yerdə seçilirlər.

Kənd məktəbində işləməyin çətinlikləri çoxdur. Məktəb avadanlıqları yoxdur və bu öz təsirini istər-istəməz göstərir. Kənd məktəbləri üçün də bu problemlər öz həllini tapsa, həm şagird, həm də biz müəllimlər üçün keyfiyyət yüksək olar.

Hər kəs özünə ta uşaqlıqdan bir sənət, peşə yaraşdırır. Müəllimlik gözəl peşədir, məsuliyyətlidir, gözəl nəticələr olduqca isə insan qürurlanır.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

13.05.2022

badge-icon
"Gənc Müəllim Danışır" rubrikamızın növbəti qonağı Süleymanov Eyvazdır.
Mən - Süleymanov Eyvaz Sahib oğlu 1995-ci ildə Tovuz rayonunda anadan olmuş, 2016-cı ildə Sumqayıt Dövlət Universitetinin Tarix və Coğrafiya müəllimliyi ixtisasını bitirmişəm. 2018-ci ildə MİQ imtahanında Coğrafiya fənnindən uğur əldə etdikdən sonra Tovuz rayonu İsakənd tam orta məktəbində Coğrafiya fənnini tədris edirəm. II Qarabağ müharibəsinin iştirakçısıyam, Prezident İlham Əliyevin sərəncamı ilə "Kəlbəcərin azad olunması" və "Vətən müharibəsi iştirakçısı" medalları ilə təltif edilmişəm. Bir neçə elmi konfransların, AGMA-nın I şəbəkələşmə forumu və çoxlu sayda təlimlərinin iştirakçısıyam. İdman yarışlarında da müxtəlif yerlər tutmuş, bir neçə fəxri fərman, sertifikat və diplomla qiymətləndirilmişəm. 

Dərslərimə maraq qatmaq üçün innovativ metodlardan istifadə edir, müxtəlif bilik yarışları təşkil edirəm. Ayın, mövsümün, ilin qalibini müəyyənləşdirib qalibləri coğrafi aksesuarlarla qiymətləndirirəm. Maraqlı dərslərimdən birində əyləncəli bilik yarışı təşkil etmişdim, şagirdlərə çox maraqlı gəldiyinə görə növbəti dərs də coğrafiya olsun deyə bilərəkdən növbəti dərsin boş olacağını söyləmişdilər. Daima şagirdlərimin maraqlarını dinləyib maraqlarına uyğun dəstək olmağa çalışıram. 

İstedadlı şagirdlərimiz çoxdur. 8-ci sinif şagirdi Quliyeva Güneli nümunə göstərim, istedadının çox olmasına baxmayaraq az çalışırdı. Onda yaratdığım həvəs və dərsə maraq sayəsində ilin qalibi oldu. 

Dərs dediyim kəndin rayon mərkəzindən 50 km. uzaq və dağlıq olmasına baxmayaraq, o qədər də çətinlik yoxdur. Yeni işə başlayanda dərsə maraq az olduğunu görürdüm, onu da, demək olar ki, aradan qaldıra bilirik. 

Kənd məktəblərinin şəhərdən əsas fərqi texnologiyaların çatışmazlığıdır. Müəllimlik peşəsini ona görə seçdim ki, müəllim üçün lazım olan peşəkar bacarıqların özümdə formalaşdığını gördüm, empatiya hissi, humanistlik, səbir, təmkin, öyrətmə və öyrənmə həvəsim olduğuna görə, yenidən ixtisas seçimi olarsa, yenə müəllimlik peşəsini seçərdim. Şagirdlərimə daim vətənpərvərlik hissi, mədəni keyfiyyətlər aşılamağa çalışıram.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link: https://ref.az/2r2ho8w


06.05.2022

badge-icon
"Gənc Müəllim Danışır" rubrikamızın növbəti qonağı Çinarə Abdulhüseynlidir.
Mən - Abdulhüseynli Çinarə Famil qızı 11.10.1999-cu il tarixində Qəbələ rayonu Vəndam qəsəbəsində anadan olmuşam. 2005-2016-cı illər ərzində Qəbələ rayonu Vəndam qəsəbəsi Elnur Bəşirov adına 3 saylı tam orta məktəbdə təhsil almış, 2016-cı ildə yüksək nəticə göstərərək Azərbaycan Dillər Universitetinin Filologiya fakültəsinin Azərbaycan dili və ədəbiyyatı müəllimliyi ixtisasına daxil olmuş, 2020-ci ildə isə universiteti uğurla bitirərək məzun olmuşam. Universitet illərində yazdığım bir çox məqalələrim qəzet və jurnallarda çap olunmuş, mənə uğur gətirmişdir. Bundan əlavə təhsil aldığım 4 il müddətində bir çox təlim və seminarlarda yaxından iştirak etmiş, layihə rəhbəri vəzifəsində olmuş, QHT-də könüllülük fəaliyyəti göstərmişəm. Uğurlu fəaliyyətlərim nəticəsində sertifikat, təşəkkürnamə və diplomla təltif olunmuşam.  Düşünürəm ki, öyrənmək heç vaxt gec deyil. Buna görə də boş vaxtlarımda mütaliələr edir, layihələr üzərində çalışır, elmi araşdırmalar aparmaqda davam edirəm. 

2021-ci ildən Qəbələ Dövlət Peşə Təhsil Mərkəzində ixtisasım üzrə fəaliyyət göstərirəm. Dərs dediyim məktəbdə istər İKT cəhətdən, istərsə də şərait cəhətdən heç bir problemlə üzləşməmişəm. Məktəbimiz müasir avadanlıqlarla təchiz olunmuş, müəllim və tələbələrin rahatlığı üçün hər cür şərait qurulmuşdur. Şagirdlərimin hamısı istedadlı və mehribandır. Onların içərisində Sevda, Fidan, Hüseyn xüsusilə fərqlənirlər. Fidan ədəbiyyat fənnini  çox sevir, mütaliələr edir. Sevda ilə Hüseyin hər dərsimə hazır gələn sevimli şagirdlərimdir. Hüseynin yazısı çox gözəldir. Hər dəfə mütləq onun dəftərinə baxıb, yazısına tamaşa edirəm. 
 Mənə elə gəlir ki, oxumaq istəyən şagird üçün heç bir coğrafi məkan mane ola bilməz. Önəmli olan şagirdin istəyi və məqsədidir. 

Mənim üçün bütün dərslər maraqlı keçir, hətta deyərdim ki, 45 dəqiqə necə keçir bilmirik. Ən maraqlı dərsimiz Nizami Gəncəvinin həyat və yaradıcılığı dərsi idi. Uşaqlar həvəslə çalışırdılar. Onlara baxıb mən də yenidən şagird olmaq istəyirdim. 

Müəllim - bu ad şərəfli addır. Müəllim adını  daşıdığım üçün çox xoşbəxtəm. Savadla silahlanan müəllim həm insan qəlbini, həm də beynini fəth edə bilər. Ona görə də müəllimin bir əlində savad, digər əlində gözəl qəlbi olmalıdır. Bundan başqa müəllim həm psixoloq, öz davranışı ilə uşaqlara nümunə olmalıdır. Müəllim həyatı cəmiyyətin  qarşısında açıq bir aynadır. Hər kəs orada öz əksini görür. 

"Müəllim! Düşüncə güllərimizi 
Əqlilə suvaran bir bağban oldu. 
Endirdi yerlərə atamız bizi
Müəllim-göylərə qaldıran oldu".


Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link: https://ref.az/2r2ho8w

29.04.2022

badge-icon
"Gənc Müəllim Danışır" rubrikamızın növbəti qonağı Elsun Əsgərovdur.
Mən - Əsgərov Elsun 1996-cı ildə Göyçay rayonunun Bəydövül kəndində anadan olmuşam. 2002-ci ildə həmin kəndin tam orta məktəbinə daxil olmuşam. Müxtəlif fənlər üzrə olimpiadalarda iştirak edərək uğurlar qazanmışam. 2013-cü ildə həmin məktəbi bitirib Bakı Dövlət Universitetinin Filologiya(Azərbaycan dili və ədəbiyyatı) fakültəsinə qəbul olmuşam. 2017-ci ildə buranı bitirdikdən sonra müxtəlif sahələrdə işləmişəm. Lakin müəllimliyə, ədəbiyyata, elmə olan sevgi yenidən məni öz getməli olduğum yola döndərdi. 2018-2019-cu illərdə BDU-da Yenidənhazırlanma təhsili aldım. 2021-ci ildə isə Zərdab rayon Kəndəbil kənd tam orta məktəbində müəllim kimi işləmək hüququ qazandım. Bunu mən həyata ikinci dəfə qayıtmaq kimi dəyərləndirərdim. Tələbəlik illərində müəllim kimi özümü təsəvvür etmirdim, çünki bu sənətin nə qədər məsuliyyətli və çətin olduğunu dərk edirdim. Amma illər ötdükcə bunu bacaracağımı və ən yaxşısını edəcəyimi hiss etdim. Və hal-hazırda müəllim kimi fəaliyyət göstərdiyim hər gün əsl bu işin adamı olduğumu daha yaxşı anlayıram. 

Dərslərin nə qədər keyfiyyətli olması daha çox müəllimə bağlıdır. Nə qədər maraqlı iş üsulu olsa da, əgər hər dəfə olduğun kimi işinə pozitiv və sevərək yanaşmırsansa, dərsin də uğurlu alınması ehtimalı çox azdır. Hansı ki bu bütün sahələrdə belədir. Sevərək edilən hər şey sonunda gözəl olur. Ancaq tədris müddətində uşaqlar daha çox qrup oyunlarına və yarışlara  maraq göstərirlər. Xüsusən də ortada hədiyyə olanda. Əsl ölüm-dirim mübarizəsi olur...

Hər bir şagirdin, təbii ki, bir istedadı var. Sadəcə müəllim onu zamanla aşkara çıxartmalıdır. Oxumayan şagird üçün də yeni iş üsulu tapıb ortaya çıxartmaq lazım gəlir. Kitab üzərində tövsiyə edilənlər bəzən yaramaya da bilir. Və onu da qeyd edim ki, istedadsız şagird yoxdur. Sadəcə səbirlə gizli məqamları ortaya çıxarmaq lazımdır.

İstedadlı şagirdlərim çoxdur. Ən xoş olan isə bəzilərinin dünya ədəbiyyatından müəyyən qədər xəbərdar olmasıdır. Viktor Hüqo, Şekspir, Cek London, Corc Bayron kimi ədəbiyyat adamlarının əsərlərindən xəbərdar olmaları sevindirici haldır. Hələ mən dərslikdənkənar neçə-neçə şeiri əzbər bilən şagirdləri demirəm.

Dərs dediyim kənddə bəzi texniki problemlər var. Amma onu da deyim ki, bu o qədər də müəllim heyətinin işinin keyfiyyətinə mane olmur. Yəni nə qədər sevgi ilə yanaşma varsa, bir o qədər də yaxşı nəticə var. 

Məncə, kənddəki şagirdlərin üstünlüyü şəhərin səs-küyündən, izdihamından uzaq olması ola bilər. Amma hər kəsə öyrəşdiyi mühit xoşdur. Yəqin ki, şəhərdəki şagirdlərə də kəndin sakitçiliyi xoş gəlməz. 

Müəllimlik istəyi məndə zamanla formalaşdı. Bu işə başladıqdan sonra isə sanki öz olmalı olduğum yeri tapdım. Müəllim olmağın hər anı əvəzolunmazdır, gözəldir. Bu çətin peşənin yollarında addımlamaq mənim üçün şərəfdir. Dövlətə, xalqa layiqli övladların yetişdirilməsi bizim vəzifəmiz və borcumuzdur. Təbii ki, bu ali işdə bizə dəstək olan və ardımızca gələn müəllimlər yetişəcək və onlar yeni-yeni şəxsiyyətlər, sənətkarlar, alimlər, yazıçılar, mühəndislər, ən əsası vətəninə, xalqına layiq insanlar formalaşdıracaq.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link: https://ref.az/2r2ho8w

22.04.2022

badge-icon
Gənc Müəllim Danışır" rubrikamızın növbəti qonağı Ülviyə Rəsulovadır.
Gənc Müəllim Danışır" rubrikamızın növbəti qonağı Ülviyə Rəsulovadır.

Mən - Ülviyə Rəsulova 1990-cı ildə Gədəbəy rayonunda anadan olmuşam. 2008-ci ildə Gədəbəy rayonu şəhid İlham Əliyev adına 2 nömrəli tam orta məktəbi bitirib, həmin il yüksək bal toplayaraq Azərbaycan Dövlət Pedaqoji Universitetinin riyaziyyat fakültəsinə qəbul olmuşam. 2014-cü ildə Müəllimlərin İşə Qəbulu müsabiqəsində iştirak edərək 91 % nəticə ilə Gədəbəy rayon İsalı kənd tam orta məktəbinə riyaziyyat müəllimi təyin olunmuşam. 2017-ci ildə Şəki rayonuna yerdəyişmə etdim. Hazırda Qax rayon Qaratala kənd tam orta məktəbində işləyirəm. 

İşlədiyim vaxtlarda  uğurlarım çox olub, bunlardan bir neçəsini qeyd etmək istəyirəm. Bu günə qədər bir çox təlimlərdə, elmi konfranslarda, seminarlarda, tədbirlərdə fəal iştirak etmişəm. Bunlardan “Ümumi təhsil müəssisələrində dərs deyən müəllimlər üçün İKT savadlılığının artırılması”, “PİSA Beynəlxalq Qiymətləndirmə”, “Azərbaycan Respubilkasının Təhsil Nazirliyi İxtisasartırma təhsili” , “Azərbaycan Respubilkasının Təhsil Nazirliyi İxtisasartırma təhsili Riyaziyyat” , Təhsildə İKT-dən istifadə metodikası” , “Avropada STEM KƏŞF KONPANİYASI həftəsi ilə” , “Müasir elmi təqdiqat  müəssəsi təlimi” , Azərbaycan Gənc Müəllimlər Assosiasiyası, “Azərbaycan müəllimlərinin səriştəsinin artırılması” təlimlərində iştirak edərək sertifikatlarla təltif olunmuşam. 

2020-ci ildə Azərbaycan Respublikasının Təhsil İnstitutunub "STEAM Azerbaijan" layihəsində iştirak edərək sertifikat almışam.   Bu il Təhsil Nazirliyinin “ Təhsildə İnkişaf və İnnovasiya üzrə V Qrant” müsabiqəsinin fərdi kateqoriya üzrə  "Gələcəyimizi bu gün quraq STEAM əsaslı təlim" layihəsinin qalibi olmuşam.

Riyaziyyat dərsini çox vaxt şagirdlər  ən çətin fənn kimi ifadə ediblər. Bunun üçün dərsin izahı zamanı mövzuya uyğun şəkillər, fiqurlar, dərs zamanı fiqurların hazırlaması, araşdıraraq öyrənmə üsullarından istifadə edirəm ki, bu da həmin mövzunun daha maraqlı və şagirdlər tərəfindən anlaşılan formada olmasına gətirib çıxarır,  riyazi qaydaları görərək toxunaraq tətbiq edirik. Bu zaman şagirdlər qaydanı eşidərək deyil toxunaraq, ölçüb hazırlayaraq tətbiq edirlər. Bölmənin sonunda şagirdlərin nələri öyrəndiklərini yoxlamaq üçün mövzulara uyğun evə bir çox sərbəst iş verirəm.  Hazırlanan işlərimizi də dərsdə səhvləri və düzlərimizi qiymətləndirmə apararaq qalib seçirik. 

İşlədiyim müddət ərzində bir çox maraqlı, istedadlı şagirdlərim olmuşdur. Vətənsevən, gözəlqəlbli, istedad dolu gəncləri saymaqla bitən deyil. Sinfimdəki şagirdlərin çoxunun bir məqsədi var, tez böyüyüb əsgər olub Ermənistanın cavabını tez və vaxtında  vermək. Gədəbəy rayonunun İsalı kənd tam orta məktəbində ilk dərs dediyim sinif 5-ci sinif idi. Sinifdə dərs zamanı Ermənistanın atdığı atəş səslərini eşitməyə başladıq, həmin vaxt şagirdlərimdən biri: "2 dəqiqə gözləyin “ Bizim  Azərbaycan əsgərləri görün necə sustduracaqlar onları” cümləsi heç vaxt yadımdan çıxmır.  Bu sözləri isə 44 günlük  Zəfərlə Azərbaycan gəncləri sübut etdi.

Dərslərdə zəif şagirdlərin mükəmməl əl işlərinin olduğunu, müxtəlif sahələrdə özlərini göstərdiklərini bilirik, onları kəşf etmək lazımdır. Ona görə zəif şagird yoxdur, hər şagirdi kəşf edib onların istedadını ortaya çıxartmaq lazımdır. Düşünürəm ki, hər bir şagird bir dəyərli xəzinədir, sadəcə onları vaxtında tapıb üzə çıxartmaq lazımdır, bu isə biz müəllimlərin üzərinə düşür.  

Sinifdə şagird varsa, o qədər də çox fərqli istedada, bacarığa malik şagird var. Fərqli istedada malik şagirdlərimdən Məmmədli Ümüd, Baxışlı Fərda STEM kəşf konpaniyası əlaqəli yarışda "Hərəkət edəbilən cisim' ilə əlaqəli sertifikat, Məmmədli Zəhra Kenquru Beynəlxalq Riyaziyyat müsabiqəsində iştirak edərək yer tutmuşdur.

 Hər insanın həyatında çətinliklər olur. Lakin bunlar onu əksinə möhkəmləndirir. Gədəbəydə, Ermənistanla sərhəd kənddə işləmək, hər gün atəş səsi  altında dərs demək, Şəkinin Əliyar kəndinə hər gün Qaxdan 85 km yol gedib gəlmək nəinki məni qorxutmayıb, əksinə işimə bağlılığımı bir az da artırıb. Hətta fəxr etmişəm ki,  vətənimə olan borcumu mən də sərhəd kəndində şagirdlərə keyfiyyətli bilik verməklə yerinə yetirirəm və ailəm hər zaman mənə dəstək olub.

Təhsili kənd və şəhər olaraq bölməzdim. Doğrudur, şəhərdə texnologiya baxımından üstünlüklər çoxdur. Şəhərdə formalaşan dünyagörüşünü kənddə də tətbiq etmək mümkündür. Düşünürəm ki, biz gənc müəllimlər həmin texnologiyanı kəndə də apara bilərik. Kənddə təhsil maraqlıdır. Çünki hər bir şagird yeniliyə can atır və hər mövzunu həm nəzəriyyə, həm də praktiki cəhətdən həvəslə öyrənir. Mən kənd məktəbində təhsil almağa başlamışam. Elmi kənd və şəhər deyə ayırmıram. Təki şagirdlərimizin hədəfləri dəqiq, məqsədləri aydın olsun. Bu gün kənd uşaqları təbiətlə daha yaxındır, texnologiyadan uzaqdır,  bu baxımdan şəhərdəki uşaqlardan üstündürlər.

Düşünürəm ki, şagirdləri sevən, qayğısına qalan, can yandıran hər bir müəllim əsl müəllimdir. Əgər şagirdləri sevirsənsə, sevərək öyrədirsənsə, onda qarşılığını hər zaman alacaqsan.  Ən böyük arzularımdan biri dövlətimiz üçün  tərbiyəli, ağıllı, savadlı, dünyagörüşlü şagirdlər yetışdirməkdir. Ən istedadlı, ən bacarıqlı uşaqlar gələcəkdə müəllim olmalıdır. Ən vicdanlı, ən ədalətli insanlar müəllim olmalıdır ki, dünyamıza sevgi dolu, pozitiv düşünərək gözəl fərdlər yetişdirsin.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link: https://ref.az/2r2ho8w

15.04.2022

badge-icon
"Gənc Müəllim Danışır" - Semur Nəsibovdur.
"Gənc Müəllim Danışır" rubrikamızın növbəti qonağı Semur Nəsibovdur.

Mən - Nəsibov Semur Ərəstun oğlu 2018-ci ildə Müəllimlərin İşə Qəbulu imtahanında iştirak edərək Ağdam rayon İmamqulubəyli kənd tam orta məktəbində, daha sonra isə Ağdam rayon 68 saylı tam orta məktəbdə coğrafiya müəllimi işləmək hüququ qazandım. Hal-hazırda isə Ağdam rayon 40 saylı ümumi orta məktəb və Ağdam rayon 129 saylı tam orta məktəblərdə coğrafiya fənnini tədris edirəm. İndiyə qədər keçirilən müxtəlif elmi və intellektual yarışlarda iştirak etmişəm. Həmin yarışlarda əldə etdiyim nailiyyətlərə görə Ağdam Rayon Təhsil Şöbəsinin rəhbərliyi tərəfindən də fəxri fərmanla təltif edilmişəm.

Dərsləri hər zaman şagirdlərin maraqlarına uyğun qurmağa çalışıram. Dərsin izahı zamanı mövzuya uyğun şəkillər, videoroliklər hazırlayıb dərsdə istifadə edirəm ki, bu da həmin mövzunun daha maraqlı və şagirdlər tərəfindən anlaşılan formada olmasına gətirib çıxarır. Xəritə üzərində ərazilər tapmaq üçün və hər bölmənin sonunda şagirdlərin nələri öyrəndiklərini  yoxlamaq üçün mövzulara aid qruplar şəklində yarışlar təşkil edirəm. Sonda qaliblərə fəxri fərmanlar, medallar təqdim edirəm ki, bu da uşaqları çox həvəsləndirir. Komandanın qalib olması üçün sinifdəki daha fəal şagirdlər öz komandalarında olan nisbətən zəif oxuyan şagirdləri də öyrədirlər ki, komanda hesabında daha çox xal qazanıb qalib ola bilsinlər. 

Kənd məktəblərinin çoxunda infrastruktur və maddi-texniki baza (laboratoriya ləvazimatları və s.) bir qədər zəif olduğuna görə bu da müəyyən qədər öz təsirini göstərir. Ancaq bu çatışmazlıqları müxtəlif üsullarla dərs müddətində aradan qaldırmağa çalışırıq.

Həmişə təbiətdə baş verən hadisələrin səbəbləri mənə maraqlı gəlirdi. Onları öyrənməyə, araşdırmağa çalışırdım. Axtardığım suallara coğrafiya fənnini oxuduqca cavab tapmağım bu fənnə qarşı məndə böyük bir sevgi və maraq yaratmışdı. Onun nəticəsi olaraq da orta məktəbi bitirib ali məktəbə seçim edən zaman ilk pilləyə coğrafiya müəllimliyi ixtisasını yazmışdım. 

Abituriyentlərə də tövsiyəm odur ki, hər zaman öz maraqlarının arxasınca getsinlər. Özlərini hansı peşədə görmək istəyirlərsə, o yolda da irəliləsinlər. Sonda mütləq öz məqsədlərinə çatacaqlar!

08.04.2022

badge-icon
"Gənc Müəllim Danışır" rubrikamızın növbəti qonağı Nərgiz Həsənovadır.
Mən - Həsənova Nərgiz Xəqani qızı 21 iyun 2000-ci ildə Ağcabədi rayon Hindarx qəsəbəsində anadan olmuşam. 

2017-ci ildə orta məktəbi bitirib 515 balla Gəncə Dövlət Universitetinin Azərbaycan dili və ədəbiyyat müəllimliyi ixtisasına qəbul olmuşam. 2021-ci ildə universiteti bitirib elə həmin il də Müəllimlərin İşə Qəbulu müsabiqəsində yüksək bal toplayaraq Ağcabədi rayon Q.Əliyev adına Hindarx qəsəbə adına 3 saylı ümumi orta məktəbdə müəllim kimi fəaliyyətə başlamışam. 21 yaşımda müəllim olmaq mənim üçün ən qürurverici bir hiss olmaqla yanaşı, həmçinin bir o qədər də həyəcanverici hiss idi. Amma özümə inanırdım. İnanırdım ki, bu peşəyə olan sevgim məni daha da öndə edəcək .Bu incə və ülvi peşəyə olan sevgimin mənbəyi isə orta məktəb dövründən qaynaqlanır. Bu arzumu yerinə yetirmək üçün isə daim mübarizə aparırdım, hətta deyərdim ki, yüksək bal yığmağıma səbəb də məhz bu peşəyə olan sevgim bais olub.

 Tədris etdiyim Azərbaycan dili və ədəbiyyat fənlərinin sirlərini şagirdlərə aşılamaq üçün müxtəlif üsullardan istifadə edirəm. Hətta yadımdadır, bir dəfə Mirvarid Dilbazinin  “Müəllimim” şeirini keçəndə mən şagirdlərə müəllimə aid 5 ədəd atalar sözü  və yaxud aforizm öyrənmələrini də dedim. Bu, şagirdlər üçün çox maraqlı oldu və artıq özləri vətənə, anaya, müəllimə aid müxtəlif tipli şeir və hikmətli sözlər öyrənirlər. Ümumiyyətlə, təkcə şagirdlərimə savad vermək deyil, həmçinin onların hərtərəfli inkişafı üçün səy göstərirəm.

Bir dəfə səhhətimlə əlaqədar bir neçə gün dərsə gedə bilməmişdim.Yenidən məktəbə gedəndə şagirdlərin sevincli şəkildə qarşıma gəlmələri  və mənə nərgiz güllərini verərək “müəllim sizin üçün çox darıxmışıq” demələri məni çox kövrəltdi və artıq anladım ki, mən onların sevgisini qazanmışam. Onların sevgisini qazanmaq məni çox sevindirir.

İşlədiyim məktəbin müasir standartlara cavab verməməsi dərsləri yeni texnologiyalarla keçmək cəhətdən problem yaradır, amma buna baxmayaraq mən yenə də yaxın müddətdə açıq dərs keçməyi planlaşdırır və bunun üzərində hazırlıq işləri görürəm.

Müəllimlik peşəsi - ən ülvi, ən vicdanlı bir peşədir. Bu peşəyə olan sevgini yaşatmaq üçün daim çalışmaq lazımdır. Arzusu müəllim olmaq hər bir abituriyentə isə demək istəyirəm ki, onlar çox şanslı insanlardır ki, içlərində müəllimlik sevdası var. Şagirdlərimə bir müəllim nümunəsi olmağımın nəticəsində artıq onların bir neçəsi gələcəkdə müəllim olmağı qarşısına məqsəd qoyub. Bir gənc müəllim üçün bundan yaxşı sevinc, uğur nə ola bilər ki? Təcrübəm az olsa da, qazandığım uğurlar məni günü-gündən daha da həvəsləndirir, çalışıram yeni fərqli metodlarla dərslər keçim. Həqiqətən də, şagirdlərlə ünsiyyətdə olduqca, onlara savad, təlim, tərbiyə verdikcə insan peşəsindən  xüsusi bir zövq alır.

01.04.2022

Populyar kurslar

Gənc müəllimlərin inkişafına dəstək olmaqdan qürur duyuruq.

Ən son yeniliklər

Daha çox

AGMA-nın yeniliklərindən xəbərdar olun

Daha çox
badge-icon
“Türkiyə-Azərbaycan Müəllimlərinin I Təhsil Zirvəsi”
AGMA olaraq Bursa Böyükşəhər Bələdiyyəsinin sədri, çox hörmətli Alinur Aktaş bəy ilə görüşdə iştirak etdik.

Görüşdə Azərbaycan və Türkiyə arasında gələcəkdə həyata keçirilməsi planlaşdırılan təhsil yönümlü layihələr haqqında müzakirələr aparılmış və yeni layihələrin dəstəklənməsi üçün ilkin razılıq əldə edilmişdir.

“Türkiyə-Azərbaycan Müəllimlərinin I Təhsil Zirvəsi” layihəsinin əsas dəstəkçisi olduğu üçün Bursa Böyükşəhər Bələdiyyəsi və Alinur bəy başda olmaqla əməyi keçən hər kəsə təşəkkür edirik. 

20.05.2022

badge-icon
AGMA və Türk Təhsil Vəqfinin Bursa şöbəsi ilə görüş keçirilib.
Azərbaycan Gənc Müəllimlər Assosiasiyası və Türk Təhsil Vəqfinin (Türk Eğitim Vakfı) Bursa şöbəsi ilə görüş keçirilib. 

Görüşdə iki təşkilat arasında gələcəkdə həyata keçirilməsi planlaşdırılan layihələr haqqında müzakirələr aparılmışdır. 

19.05.2022

badge-icon
AGMA və Uludağ Üniversitesinin rektoru prof. dr. Ahmet Saim Kılavuz bəy ilə görüş keçirildi.
Azərbaycan Gənc Müəllimlər Assosiasiyası və Uludağ Üniversitesinin rektoru prof. dr. Ahmet Saim Kılavuz bəy ilə görüş keçirildi.

Azərbaycan Gənc Müəllimlər Assosiasiyası (AGMA) Uludağ Universitetinin rektoru, hörmətli  prof. dr. Ahmet Saim Kılavuz bəy ilə görüşərək Azərbaycan Türkiyə Müəllimlərinin I Təhsil Zirvəsi layihəsi çərçivəsində göstərdiyi dəstəyə görə minnətdarlıq bildirdi. Həmçinin hörmətli Ahmet bəy ilə növbəti mərhələdə keçirilməsi planlaşdırılan layihələr və müəllimlərin ixtisasartırma kursları ilə bağlı ilkin razılıq alındı.

18.05.2022

badge-icon
AGMA və Türkiyə Təhsil Könüllüləri Vəqfinin Bursa şöbəsi ilə görüş keçirilib
Azərbaycan Gənc Müəllimlər Assosiasiyası və Türkiyə Təhsil Könüllüləri Vəqfinin (TEGV(Türkiye Eğitim Gönüllüleri) Bursa şöbəsi ilə görüş keçirilib. 

Görüşdə iki təşkilat arasında gələcəkdə həyata keçirilməsi planlaşdırılan layihələr haqqında müzakirələr aparılmışdır. 

18.05.2022

Ən son bilikləri, yeni proqram və metodları bizimlə öyrənin.

Müəllim insanları aydınlığa çıxaran işığa bənzəyir.

Onların uğurlu olmaqlarının sirlərini öyrənin

Əziz gənc müəllimlər, yeni nəsil sizin əsəriniz olacaqdır!

12

ÜMUMİ KURSLAR

2500

AKTİV MÜƏLLİM

4000

ÜZV SAYI

Yeniliklərə abunə olun

Hər gün yenilənən xəbər və yeniliklərdən xəbərdar olun