Azərbaycan Gənc Müəllimlər Assosiasiyası 13 yanvar 2026-cı il tarixindən etibarən xarici ölkələrdə yaşayan azərbaycanlılar üçün “Ana dili” – Azərbaycan məktəbinin II yarımili üzrə qeydiyyatını elan edir.

“Ana dili" – Azərbaycan məktəbi ölkəmizdən kənarda yaşayan müxtəlif yaş qruplarından olan soydaşlarımız üçün Azərbaycan dilini məsafədən öyrənmə imkanını təmin edən layihədir. Layihədə iştirak etmək istəyən şəxslər öz yaş və dilbilmə səviyyələrinə, həmçinin vaxt zonasına uyğun yaradılan qruplarda Azərbaycan dili dərslərinə qoşulmaq imkanı əldə edirlər. 

2025-2026-cı tədris ilini əhatə edən layihədə dərslər ödənişsiz əsaslarla təcrübəli mütəxəssislər tərəfindən keçirilir. Hazırda 200-dən çox soydaşımız dərslərə qoşulur. İkinci yarımil üzrə dərslərin 01.02.2026-cı il tarixində başlaması nəzərdə tutulmuşdur.

Qeydiyyat linki: https://forms.gle/VVCuddeh8AxpjQcU7

Elektron poçt: [email protected]

Mobil: +994 51 226 71 21 (“WhatsApp”, “Telegram”)

Son müraciət tarixi: 28 yanvar 2026-cı il.

Hörmətli müəllimlər, 

Azərbaycan Gənc Müəllimlər Assosiasiyasının və Elm və Təhsil İşçiləri Həmkarlar İttifaqının təşkilatçılığı ilə 20–21 dekabr 2025-ci il tarixlərində Gənc müəllimlərin “V Şəbəkələşmə Forumu” keçiriləcək.

 İki gün davam edəcək forumda gənc müəllimlər üçün aşağıdakı mövzularda sessiyalar təşkil olunacaq: 

İstedadlı uşaqlarla işin təşkili; 

Media savadlılığı; 

Maliyyə savadlılığı; 

Rəqəmsal savadlılıq; 

Süni intellektin tədrisdə tətbiqi.

Gənc müəllimlərin “V Şəbəkələşmə Forumu”nun əsas məqsədi gənc müəllimlər arasında qarşılıqlı əlaqəni gücləndirmək, onların peşəkar inkişafına dəstək olmaq və müasir tədris tələblərinə uyğun bilik və bacarıqlarını artırmaqdır. Forum müəllimlərə həm nəzəri, həm də praktiki təcrübə qazanmaq imkanı yaradaraq onların təhsildə yenilikçi yanaşmalarla tanış olmasına şərait yaradacaq.

Tarix: 20–21 dekabr 2025

 Məkan: Xaçmaz rayonu, Nabran qəsəbəsi, “Təhsil” istirahət mərkəzi

Qeydiyyat linki: https://forms.gle/HpgzJhpsvjcwA1s6A

Son qeydiyyat tarixi: 12 dekabr 2025-ci il, saat 14:00.

Gənc Müəllimlər: Suverenlik Yolunda Təhsil Missiyası Forumu bu dəfə Tərtərdə 

Azərbaycan Gənc Müəllimlər Assosiasiyası (AGMA), Elm və Təhsil İşçiləri Həmkarlar İttifaqı və Qarabağ Regional Təhsil İdarəsinin birgə təşkilatçılığı ilə “Gənc Müəllimlər: Suverenlik Yolunda Təhsil Missiyası Forumu” keçiriləcək.

Məkan: Tərtər şəhəri, Şikar Şikarov adına 5 saylı tam orta ümumtəhsil məktəbi
Tarix: 1 noyabr
Saat: 11:00

Forumun məqsədi gənc müəllimlərin milli-mənəvi dəyərlərə sadiq şəkildə təhsildə suverenlik missiyasını gücləndirmək, maarifləndirici və təşəbbüskar fəaliyyətlərini dəstəkləməkdir.

Gənc müəllimlərimizin iştirakı ilə baş tutacaq bu tədbir, gələcəyimizin formalaşmasında mühüm rol oynayan təhsilin əhəmiyyətinə bir daha işıq salacaq. 

 Azərbaycan Gənc Müəllimlər Assosiasiyasının təşkilatçılığı ilə “Qeyri-formal təhsildə təlimçinin əl kitabı” adlı vəsaitin təqdimatı keçiriləcəkdir. Qeyd edək ki, bu kitab qeyri-formal təhsil sahəsində fəaliyyət göstərən təlimçilər üçün dəyərli bir vəsaitdir.

Gəlin birlikdə bu faydalı nəşrin təqdimatında görüşək!

Tarix: 11 oktyabr

Saat: 14:00

Məkan: ADPU – Kitabxana-İnformasiya Mərkəzi

Qeydiyyat linki: https://forms.gle/SGGWDieskCQESoLb8

Hörmətli müəllimlər,

11 oktyabr 2025-ci il, saat 10:00-da Azərbaycan Gənc Müəllimlər Assosiasiyasının təşkilatçılığı və Elm və Təhsil İşçiləri Həmkarlar İttifaqının tərəfdaşlığı ilə “Suverenlik Yolunda Təhsil Missiyası” adlı Forum keçiriləcək.

“Gənc Müəllimlər: Suverenlik Yolunda Təhsil Missiyası Forumu” nun əsas məqsədi — gənc müəllimlər arasında milli-mənəvi dəyərləri möhkəmləndirmək, müstəqillik və suverenliyin qorunmasında müəllimin rolunu vurğulamaq, eləcə də təhsil işçilərinin bu istiqamətdəki missiyasını müzakirə etməkdən ibarətdir.

 Tarix: 11 oktyabr 2025
 Saat: 10:00
 Məkan: Azərbaycan Dövlət İqtisad Universiteti (əsas bina)

Qeyd: Forumda iştirak etmək istəyənlərdən əvvəlcədən qeydiyyatdan keçmələri xahiş olunur.

Qeydiyyat linki: https://forms.gle/VtwYif5jqgF9JDSN8

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və Azərbaycan Gənc Müəllimlər Assosiasiyasının təşkilatçılığı ilə həyata keçiriləcək layihənin məqsədi xaricdə yaşayan soydaşlarımıza ana dilini, milli kimliyi öyrətmək, milli şüurlu insan kapitalı formalaşdırmasını və qorunmasını təmin etməkdən ibarətdir.

Yaş qrupları:
- Kiçik yaş qrupu: 6–10 yaş
- Orta yaş qrupu: 11–13 yaş
- Yuxarı yaş qrupu: 14–18 yaş

Tədris prosesi:
- Onlayn dərslər 15 sentyabr 2025-ci ildən etibarən başlayacaq.
- Dərslər həftədə 2–3 dəfə olmaqla onlayn şəkildə keçiriləcək.
- Təcrübəli müəllimlər tərəfindən tədris edilən dərslər interaktiv və maraqlı formada aparılacaq.
- Proqram 3 səviyyədə – başlanğıc, orta, yüksək – olmaqla hazırlanıb.

Müraciət və seçim:
Layihədə iştirak etmək istəyən şəxslər yaş qruplarına, dil bilik səviyyələrinə və vaxt zonalarına uyğun olaraq qruplara bölünəcəklər və dərslərə qoşulacaqlar. Bunun üçün əvvəlcədən təşkil ediləcək qısa dil yoxlamasından keçmək tələb olunur.

Qeyd edək ki, proqramı uğurla başa vuran iştirakçılara Azərbaycan dilini bilmə səviyyəsinə uyğun sertifikat təqdim olunacaq.

🔗 Qeydiyyat üçün link: https://forms.gle/VNgBnBysP4Mzb9rHA

"Yaşıl məktəblər üçün gənc müəllimlərin beynəlxalq təcrübə mübadiləsi" proqramı ilə qarşınızdayıq.

Layihə çərçivəsində beynəlxalq və yerli olmaqla ümumilikdə 20 iştirakçının 4 günlük təcrübə mübadiləsində, daha sonra isə “Naturethon” tədbirində iştirakı nəzərdə tutulub.

Nəzərinizə çatdırırıq ki, qalib komanda üzvləri “Təhsil müəssisələrində yaşıl dünya konsepsiyasının tətbiqi mexanizmləri” ilə bağlı “Təkliflər toplusu” hazırlayacaq və sənəd müvafiq qurumlara təqdim ediləcək.

Layihədə iştirak üçün tələblər:

- Yaş həddi 18-35;

- Minimum B2 səviyyəsində ingilis dili;

- Layihənin bütün mərhələlərində tam iştirak.

Layihə Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, Azərbaycan Gənc Müəllimlər Assosiasiyasının təşkilatçılığı və Çin Biomüxtəlifliyin Qorunması və Yaşıl İnkişaf Fondunun tərəfdaşlığı ilə keçirilir.

Qeydiyyat linki: https://forms.gle/hXfR4AEUdE7D1tpD8

Azərbaycan Gənc Müəllimlər Assosiasiyası (AGMA) sədr üçün müraciətləri açıq elan edir!
 
Sədrlik üçün müraciət edən namizədlərə dair xüsusi tələblər:
 
●Ali təhsil (pedaqoji ixtisaslar üzrə);
● Magistr dərəcəsi;
● Strategiyaların hazırlanması və təhlil edilməsi üzrə təcrübə;
● Pedaqoji təcrübə və ya təhsil idarəetməsi sahəsində ən azı 2 il iş təcrübəsi (özəl və ya dövlət ümumi təhsil müəssisəsində);
● Layihələrin idarə edilməsi, kommunikasiya və ya digər əlaqəli sahələr üzrə təcrübə;
● Gənclərlə iş sahəsində minimum 2 illik təcrübə;
● Komanda quruculuğu, təşkilatçılıq sahələri üzrə təcrübə;
● Azərbaycan və ingilis dillərində sərbəst danışıq və yazı qabiliyyəti (rus dili arzuolunandır);
● “MS Office” proqramlarında sərbəst işləmək bacarığı, müxtəlif proqramlar vasitəsilə təqdimatların hazırlanması;
● Təşkilatçılıq və liderlik keyfiyyətləri;
● Analitik düşünmə və problem həlletmə;
● Ünsiyyət və komanda da işləmək bacarıqları.
 
Vəzifə öhdəlikləri: 
 
● Regionlarda fəaliyyət göstərən gənc müəllimlərlə şəbəkələşmənin inkişaf etdirilməsi məqsədilə görüş, dəyirmi masa və tədbirlər keçirmək;
● Gənc müəllimlər arasında mütəmadi olaraq təhsilin aktual məsələləri ilə bağlı sorğular keçirmək və təhlillər aparmaq;
● Aidiyyəti üzrə layihələr hazırlamaq və təkliflər vermək;
● Aidiyyəti dövlət, özəl və beynəlxalq strukturlarla əməkdaşlıq etmək;
● Gənc müəllimlərin təlim ehtiyaclarını müəyyənləşdirərək uyğun olaraq təlim proqramları və kurslar təşkil etmək;
● Assosiasiyanın üzv bankını genişləndirmək və fənn birliklərinin fəaliyyətinə nəzarət etmək;
● Rüblük, yarımillik və illik hesabatlar hazırlamaq, aidiyyəti üzrə təqdim etmək;
● "Azərbaycan Respublikasının 2022-2026-cı illərdə sosial-iqtisadi inkişaf Strategiyası" da nəzərdə tutulmuş fəaliyyətlərin həyata keçirilməsi istiqamətində tədbirlər görmək;
● Ölçülə bilən indikatorlar göstərilməklə illik fəaliyyət planı hazırlamaq və icrasını həyata keçirmək;
● Yeniliklər və tədbirlərlə bağlı mütəmadi olaraq yazılı və onlayn mediada təbliğat işləri aparmaq və çıxışlar etmək.

Müraciət edəcək müəllimlərin Bakı şəhərindən olmaları mütləqdir.

Yalnız seçilmiş namizədlərlə əlaqə saxlanılacaq.

AGMA sədrliyinə müraciət üçün qeydiyyat linki: https://ref.az/3oFCg1G 

Sədr müavinliyi, İdarə Heyəti və Mərkəzi Nəzarət-Təftiş Komissiyasının (MNTK) üzvlüyünə müraciət üçün isə CV, tərcümeyi-hal və tövsiyə məktubunu [email protected] elektron poçt ünvanına müvafiq başlığı yazmaqla göndərmək mümkündür.

Müraciət üçün son tarix: 10.09.2024-cü il.
 
Siz də AGMA komandasına qoşulmaq istəyirsinizsə, qeydiyyatdan keçə bilərsiniz.