"Gənc Müəllim Danışır" rubrikamızın növbəti qonağı Semur Nəsibovdur.

Mən - Nəsibov Semur Ərəstun oğlu 2018-ci ildə Müəllimlərin İşə Qəbulu imtahanında iştirak edərək Ağdam rayon İmamqulubəyli kənd tam orta məktəbində, daha sonra isə Ağdam rayon 68 saylı tam orta məktəbdə coğrafiya müəllimi işləmək hüququ qazandım. Hal-hazırda isə Ağdam rayon 40 saylı ümumi orta məktəb və Ağdam rayon 129 saylı tam orta məktəblərdə coğrafiya fənnini tədris edirəm. İndiyə qədər keçirilən müxtəlif elmi və intellektual yarışlarda iştirak etmişəm. Həmin yarışlarda əldə etdiyim nailiyyətlərə görə Ağdam Rayon Təhsil Şöbəsinin rəhbərliyi tərəfindən də fəxri fərmanla təltif edilmişəm.

Dərsləri hər zaman şagirdlərin maraqlarına uyğun qurmağa çalışıram. Dərsin izahı zamanı mövzuya uyğun şəkillər, videoroliklər hazırlayıb dərsdə istifadə edirəm ki, bu da həmin mövzunun daha maraqlı və şagirdlər tərəfindən anlaşılan formada olmasına gətirib çıxarır. Xəritə üzərində ərazilər tapmaq üçün və hər bölmənin sonunda şagirdlərin nələri öyrəndiklərini  yoxlamaq üçün mövzulara aid qruplar şəklində yarışlar təşkil edirəm. Sonda qaliblərə fəxri fərmanlar, medallar təqdim edirəm ki, bu da uşaqları çox həvəsləndirir. Komandanın qalib olması üçün sinifdəki daha fəal şagirdlər öz komandalarında olan nisbətən zəif oxuyan şagirdləri də öyrədirlər ki, komanda hesabında daha çox xal qazanıb qalib ola bilsinlər. 

Kənd məktəblərinin çoxunda infrastruktur və maddi-texniki baza (laboratoriya ləvazimatları və s.) bir qədər zəif olduğuna görə bu da müəyyən qədər öz təsirini göstərir. Ancaq bu çatışmazlıqları müxtəlif üsullarla dərs müddətində aradan qaldırmağa çalışırıq.

Həmişə təbiətdə baş verən hadisələrin səbəbləri mənə maraqlı gəlirdi. Onları öyrənməyə, araşdırmağa çalışırdım. Axtardığım suallara coğrafiya fənnini oxuduqca cavab tapmağım bu fənnə qarşı məndə böyük bir sevgi və maraq yaratmışdı. Onun nəticəsi olaraq da orta məktəbi bitirib ali məktəbə seçim edən zaman ilk pilləyə coğrafiya müəllimliyi ixtisasını yazmışdım. 

Abituriyentlərə də tövsiyəm odur ki, hər zaman öz maraqlarının arxasınca getsinlər. Özlərini hansı peşədə görmək istəyirlərsə, o yolda da irəliləsinlər. Sonda mütləq öz məqsədlərinə çatacaqlar!