"Gənc Müəllim Danışır" rubrikamızın növbəti qonağı Aydan Quliyevadır.

Mən - Quliyeva Aydan Şəmsi qızı 1991-ci il noyabr ayının 7-si Biləsuvar rayonunda anadan olmuşam. 2009-cu ildə Lənkəran Dövlət Universitetinin ingilis dili müəllimliyi ixtisasına daxil olmuş və 2013-cü ildə həmin universiteti bitirmişəm.

 İxtisasım üzrə müxtəlif təlimlərdə iştirak etmiş (Tesol və İELTS) və sertifikatlar qazanmışam. 2016-cı ildə Müəllimlərin İşə Qəbulu imtahanında uğur qazanaraq Biləsuvar rayonu Arazbarı kənd tam orta məktəbinə işə qəbul olmuşam. Həmin ilin dekabr ayında Azərbaycanın Milli Qəhrəmanı Mübariz İbrahimov adına Biləsuvar Bağça –Məktəb –Lisey kompleksində müvəqqəti müqavilə ilə işə dəvət edilmişəm. 2017-ci ildən isə daimi əsaslarla müəllimlik fəaliyyətimi Təhsil kompleksində davam etdirirəm. 2021–ci ilin oktyabr ayından Amerika səfirliyinin Education USA proqramının Biləsuvar rayonu üzrə təlimçi müəllimi kimi fəaliyyət göstərirəm.

Öyrətmək elə bir işdir ki, ondan heç bir zaman doymaq olmur. Mən öyrətmə prosesini daha maraqlı etmək üçün müxtəlif üsullardan və yarışlardan istifadə edirəm. Şagird üçün vizuallıq daha maraqlı gəlir. Müasir texnologiyaların imkanlarından istifadə edərək şagirdlərim üçün dərs prosesini daha maraqlı edirəm. Müxtəlif yarışlar keçirdirəm və qalib şəxsi və ya qrupu kiçik hədiyyələr ilə mükafatlandırıram (Yutub kanalıma bu yarışları mütəmadi yerləşdirirəm) və ya bəzən də həftənin, ayın qalibi elan edirəm.

Mən düşünürəm ki, bütün dərslərim maraqlı və yaddaqalan keçir. Təbii ki, bəzən elə dərs olur ki, o bizim yaddaşımızda əbədi iz qoyur. Liseyə getdiyim gün ilk dərsim 8-ci sinfə oldu. O sinfin ingilis dili müəllimi məzuniyyətə getdiyi üçün mən əvəz edirdim. Şagirdlər əvvəlki müəllimlərinə olan sevgisindən mənə, ilk öncə, soyuq yanaşdılar. Həmin dərs özümə söz verdim ki, bu sinif məni də çox sevəcək. Elə ilk dərsin sonunda şagirdlərin münasibətinin yavaş-yavaş dəyişdiyini hiss etdim. Həmin sinif 2021-ci ildə 100%-lik nəticə ilə Respublikanın ən öndə gedən universitetlərinə daxil oldular. Bu gün o sinfin şagirdləri ilə müəllim-şagird münasibətindən daha çox dost münasibətimiz var.

Şagirdlərim sözün əsl mənasında çox istedadlıdırlar. Onlarla işləmək mənim ruhumu qidalandırır. Şagirdlərimin istedadlarını üzə çıxarmaq üçün rayondaxili və ya ölkədaxili yarışlara, layihələrə yönləndirirəm. Bu yaxınlarda 13 şagirdim Education USA-in region seçimlərində iştirak etdi və uğur qazandı. Həmin şagirdlər layihəni başa vurduqdan sonra beynəlxalq sertifikatla təmin olunacaqlar. Çalışıram ki, bütün yeniliklərdən xəbər tutum və şagirdlərimi bu yeniliklərdən xəbərdar edim.

Müəllimlik fəaliyyətim dövründə bir çox istedadlı şagirdlərlə qarşılaşmışam və hal- hazırda da belə şagirdlərim var. 

Hal-hazırda dərs dediyim Biləsuvar liseyində heç bir çətinliklə qarşılaşmıram. Lakin kənd məktəbində çalışdığım dövrdə bir çox problemlər ilə üzləşmişdim. Maddi-texniki bazanın çatışmazlığı, şagird sayının azlığını buna nümunə gətirə bilərəm.

Kənd və şəhər məktəbi arasında ən böyük fərq maddi-texniki bazanın çatışmazlığı və məktəblərin istənilən vəziyyətdə olmamasıdır. Şagirdlər savadlı olsalar belə məktəbin yaxşı şəraitdə olmaması onların təhsilinə mənfi təsir göstərə bilir. Ən böyük fərq kimi mən bunu görürəm. Əslində indi əvvəlki illərə nisbətən vəziyyət yaxşıdır. Hal-hazırkı dövrdə gənc müəllimlər kənddə işləməyə daha çox həvəs göstərirlər. Düşünürəm, bu halı müsbət hesab etmək olar.

Müəllimlik dünyada ən çətin və eyni zamanda  ən şərəfli və hörmətli bir peşədir. Müəllim valideyndən sonra, bəlkə, 2-ci şəxsdir ki, şagirdin sevincinə sevinər, kədərinə isə kədərlənər. Müəllim əməyinin nəticəsində cəmiyyət formalaşır, savadlı, hərtərəfli və dünyagörmüş şəxslər yetişir. ”Mən dünyada müəllim adından daha şərəfli ad tanımıram” deyən Ulu öndər H. Əliyev bu deyimində müəllimliyin necə ülvi bir peşə olduğunu göstərmişdir. Mən də şagird olmuşam və müəllimlərimdən gördüyüm isti münasibət müəllim olmaq istəyimdə başlıca səbəb olub. Müəllim olmaq istəyən şagirdlərimə isə demək istəyirəm ki, bu peşəni sevirlərsə və ətrafa sevgi yaya bilirlərsə, bu ixtisasa sahib olsunlar, əks-təqdirdə uğur qazanmaq qeyri-mümkün bir işdir. Düşünürəm ki, biz müəllimlər də şagirdlərimiz üçün bir nümunəyik. Beləliklə, onlar da bizlərdən öyrəndiklərini gələcəkdə şagirdlərinə aşılayacaqlar. Sevgi-hörmət-qayğı bu peşədə ilk prioritetdir. Özümü şanslı hesab edirəm, çünki mən də bu şərəfli peşənin bir nümayəndəsiyəm.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.

Qeydiyyatdan keçmək üçün link : https://ref.az/2r2ho8w