"Gənc Müəllim Danışır" rubrikamızın növbəti qonağı Nəcibə Uğurliyevadır.

Mən  Uğurliyeva Nəcibə Mirssalı qızı 1989-ci il avqust ayının 21-də İmişli rayonu  Otuziki kəndində anadan olmuşam. 1995-ci ildə İmişli rayon Otuziki kənd tam orta məktəbində təhsil almağa başlamış, 2006-ci ildə həmin məktəbi bitirmişəm. 2008—2012-ci illərdə Azərbaycan Müəllimlər İnstitutunun Cəlilabad filialında İbtidai təhsilin pedaqogikası və metodikası ixtisası üzrə ali təhsil almışam. 2012-ci ildə Müəllimlərin İşə Qəbulu imtahanında iştirak edərək Otuziki kənd tam orta məktəbinə işə qəbul olmuşam. 2015-ci ildə yerdəyişmə edərək Qaralar kənd A.Allahverdiyev adına tam orta məktəbində pedaqoji fəaliyyətimə davam etmişəm və hal-hazırda burada çalışıram. Təhsil Nazirliyinin keçirdiyi Diaqnostik Qiymətləndirmədə 55 bal toplayaraq hər zaman yenilikləri öyrənməyə səy göstərirəm. İxtisasımla bağlı bir çox onlayın və əyani təlimlərdə uğurla iştirak etmişəm. Təlimlərdə öyrəndiklərimi müəllimlik fəaliyyətimdə tətbiq etməyə çalşıram.

Yaxşı bir müəllim ola bilmək üçün peşəmizə və ümumiyyətlə, insanlara xas olan bir çox xüsusiyyətlərə sahib olmalı,  malik olduğumuz bu xüsusiyyətləri də hər gün artırmalı və çox üstün  bir şəkildə peşəmizi təmsil etməliyik. Çalışmaq lazımdır ki, dərs şagirdlər üçün maraqlı olsun. Bunun üçün mən çox zaman şagirdlərlə yarış xaraxterli oyunlar keçirirəm. Şagirdlərin belə oyunlarla dərs öyrənməyə xüsusi marağı və sevgisi olur. Mühazirə xarakterli dərslər ibtidai sinif şagirdləri üçün cansıxıcı olur. Uşaqlar özləri fəal iştirak edərək öyrənməyə həmişə üstünlük verir. Mən də buna görə dərslərimi şagirdlərin maraqlarına uyğun formada qurub öyrətməyə çalışıram.

Hər bir dərsimə diqqətlə yanaşıram. Dərslərimi yaddaqalan etməyə çalışıram. Dərs nə qədər maraqlı təşkil olunarsa,  o qədər yaddaqalan olur. Şagirdlər dərs müddətinin bitməsinə sevinmirsə deməli dərs onların ürəyincədir və yaddaqalandır. Mənim üçün ən yaddaqalan dərs ilk dəfə müəllim kimi sinfə daxil olduğum gündür.

Hər bir şagird müəyyən sahə üzrə istedadlıdır. Sadəcə onların istedadını üzə çıxarıb vaxtında istiqamət verəndə yaxşı nəticələr verir. İstedadlı uşaqların müəyyənləşdirilməsi artıq ibtidai sinifdə müşahidə, psixoloji xüsusiyyətləri, danışma, yaddaş, məntiqi təfəkkürün öyrənilməsi əsasında başlanılmalıdır.  İstedadlı və bacarıqlı şagirdlərlə işləmək, onların aşkara çıxarılması və inkişafı məktəb fəaliyyətinin ən vacib aspektlərindən birinə çevrilməlidir. Bu gün Azərbaycan təhsilinin əsas məqsədlərindən biri  istedadlı uşaqların üzə çıxarılması, onların qabiliyyət və yaradıcılıq  imkanlarının aşkarlanması, inkişaf etdirilməsidir.  Cəmiyyətimiz bir sıra məsələlərin həllini məhz bu cür uşaqlardan gözləyir. Uşaqların vaxtında aşkarlanması, dəstəklənməsi və inkişafının təmin edilməsi əsas hədəflərimizdəndir.    Pedaqoji fəaliyyətim illərində bir çox istedadlı uşaqlarla qarşılaşmışam. Onlardan bəzisi xüsusi idarəçilik qabiliyyəti ilə, bəzisi elmin müxtəlif sahələri üzrə fikirləri, düşüncələri ilə diqqəti cəlb ediblər.

İşlədiyim təhsil müəssisəsində ən böyük çətinliyim maddi-texniki bazasının zəif olması, elektron resursların olmaması ilə bağlı olub. Proyektor, elektron lövhə, internet kimi elektron resurslarının az sayda olması dərslərimi qurmaqda bəzi çətinliklər yaradıb. Amma bunlara baxmayaraq açıq dərsimdə, əlamətdar günlərdə və digər dərslər zamanı elektron resurslardan istifadə etmişəm.  Təklifim bütün məktəblərin sinif sayı qədər imkan daxilində elektron resurslarla təmin edilməsidir. Xüsusən də ibtidai sinif şagirdləri vizual olaraq gördüklərini yaddaşlarında yaxşı saxlayırlar. Buna görə də siniflərin bu resurslarla təmini dərsləri daha maraqlı və yaddaqalan edir.

Kəndə təhsil alan şagirdlərlə şəhərdə təhsil alan şagirdlər arasında bir çox fərq var. Şəhər yerlərində, rayon mərkəzlərində uşaqlar məktəbə, demək olar ki, hazır vəziyyətdə gəlirlər. Bir çoxları dərsdən sonra hazırlığa gedir və yaxud evdə valideyn övladına daha çox zaman ayırır, dərslərində köməklik edir. Bu uşaqların dünyagörüşü geniş, düşünmə, nəticə çıxarma, ətrafda baş verənləri dərketmə qabiliyyəti güclü olur. Ancaq kənd yerlərində belə deyil. Kənddəki uşaqların əksəriyyəti bir çərçivə, bir sərhəd daxilində olur. Onların dünyagörüşü bu sərhədlə məhdudlaşır. Təbii ki, bunu hər kəndə və hər uşağa şamil etmirəm. Eyni zamanda kənddə təhsil alan uşaqların üstün cəhətləri də var. Onlar təbiətlə daim təmasda olur. Şəhər uşaqlarının kitabdan oxuyub öyrəndiklərini onlar canlı təmasla daha yaxşı öyrənmiş olurlar.

Hər birimiz üçün müəllim doğma və əzizdir. Çünki müəllim bizə təhsil verir, dərs öyrədir, yol göstərir, daim qayğımıza qalır. Buna görə də müəllimlərimizi böyük ehtiram və hörmətlə xatırlayırıq. Öyrəndiklərimizə görə həmişə onlara minnətdarıq. Müəllimlər cəmiyyətin memarlarıdır desək, yəqin ki, səhv etmərik. Bu danılmaz bir həqiqətdir ki, hər kəsin layiqli vətəndaş kimi formalaşmasında müəllimlərimizin əvəzsiz xidmətləri vardır.Müəllimlik çətin  peşə olsa da sənətini sevirsənsə, bu çətinlik sənə mane ola bilməz. Şagirdin üzündəki kiçik bir təbəssüm bütün çətinlikləri unutdurur.  Qələm tutmağı, hərfləri yazmağı öyrənməsi təkcə şagirdi deyil, bir o qədər də müəllimi sevindirir. Müəllimlik eyni zamanda səbr tələb edən sahədir. Hər bir şagirdin xarakterinə uyğun davranmaq,onların qayğısını çəkmək asan iş deyil. Gələcəkdə müəllim olmaq istəyən abituriyentlərə, şagirdlərə tövsiyə edirəm ki, bu peşəni seçirsinizsə, peşənizi yaxşı öyrənməklə bərabər uşaqların qəlbinə yol tapmağı da öyrənməlisiniz. Çünki , uşaqlar onları başa düşən, onlara qayğı ilə yanaşan müəllimləri daha çox sevir və həmin dərsi maraqla öyrənir.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.