"Gənc Müəllim Danışır" rubrikamızın növbəti qonağı Sevinc Məmmədəliyevadır.

Mən - Məmmədəliyeva Sevinc Alxas qızı 1995-ci ildə Yevlax rayon Salahlı kəndində anadan olmuşam. Yevlax rayon B. Alıyev adına Salahlı kənd tam orta məktəbində oxumuşam. 2012-ci ildə həmin məktəbi bitirmiş və həmin ili Gəncə Dövlət Universitetinin Biologiya-Kimya fakültəsinin Biologiya müəllimliyi ixtisasına daxil olmuşam. 2016-cı ildə universiteti müvəffəqiyyətlə bitirdikdən sonra 2017-ci ildə Müəllimlərin İşə Qəbulu imtahanında iştirak edib 53 bal toplayaraq Yevlax rayon Aran qəsəbə V. Əmiraslanov adına 2 saylı tam orta məktəbində Biologiya müəllimi olaraq fəaliyyətə başlamışam. Artıq 4 ildir ki, sevdiyim peşəmi layiqincə icra etməyə çalışıram.

Biologiya fənni özü maraqlı, rəngarəng bir fəndir.Təbiətin canlı əsərləri olan müxtəlif canlıları öyrənmək uşaqlar üçün də çox maraqlıdır. Mən də çalışıram ki, şagirdlərimlə birlikdə dərsə daha da maraq qataq. Lazım gəldikcə dərsləri məktəbimizin həyətində təbiət qoynunda keçirik. Onların əyani görüb öyrənmələri üçün əlimdən gələni edirəm. Hər mövzuya uyğun evlərindən gətirdikləri əyani vasitələr, hazırladıqları herbariler, kibrit çöpündən hazırladıqları çiçək qrupları və s. ilə onların bu fənnə maraq göstərdiklərini, öyrənmək istədiklərini görürəm.

İnsan sevdiyi peşə ilə məşğul olursa, onun hər günü daha fərqli, daha yaddaqalan keçir. Fəaliyyətə başladığım ilk gündən çalışıram ki, hər dərsimiz daha maraqlı və şagirdlərin yaddaşında iz qoyacaq olsun. Onlarla günüm zəng səsini eşitməyəcək qədər maraqlı keçir. Şagirdlərimin gözündəki sevgi, həvəs mənə bəs edir.

Hər bir şagirdin daxilində kəşf olunmağı gözləyən inci olduğunu düşünürəm. Bəzi şagirdlər zaman keçdikcə öz dəyərlərini kəşf edirlər. Ancaq bəzi şagirdlərə ata, ana və ya müəllim dəstəyi lazımdır. Mənim üçün bütün şagirdlərim dəyərlidir. Ancaq elə şagirdlər var ki, onlara xüsusi qayğı, dəstək lazım olur. Mən də onlara əlimdən gələn köməyi etməyə çalışıram. Şagirdlərə Biologiya fənnini tədris etməklə yanaşı onların yaxşı dinləyicisi də olmağa çalışıram. Bilmirəm bunu nə dərəcədə bacarıram. Ancaq onlarla qərarlarını, xəyallarını da müzakirə etməyi özümə borc bilirəm.

Vacib olan o deyil ki, mütləq şəkildə hər şagird ali təhsil almalı və ya yarımili, ili yüksək nailiyyətlərlə bitirməlidir. Əsas odur ki, hər bir şagird şəxsiyyət kimi formalaşsın və dünən də, bu gün də, sabah da xoşbəxt həyat tərzi yaşasın. Hər bir insanın haqqıdır ki, sevdiyi işi görsün, sevdiyi ixtisasa yiyələnsin.

Mənim elə şagirdlərim olub ki, biologiya fənnini əla qiymətlərlə oxumayıb, ancaq hər hansısa maket hazırlayarkən və ya hansısa bitki, heyvan haqqında elə gözəl təqdimatlar hazırlayıblar ki. Mövzuya uyğun rəsmlər çəkərkən şagirdlərimin qabiliyyətlərinin də şahidi olmuş və çalışmışam ki, onları həvəsləndirim.

Deməli, dünyada nə qədər çox fərqli insan varsa, o qədər də çox fərqli istedada, bacarığa malik insanlar da var. Biz müəllimlər də şagirdlərin istedadlarının üzə çıxmasında onlara daima kömək etməliyik.

Dərs keçdiyim məktəb yaşadığım kəndə o qədər də uzaq deyil. Avtobusla getdiyimə görə bəzən çətinliklər olur. Əsas da soyuq qış aylarında avtobus gözləmək çətin olur.

İnsanın biliyi, savadı, sahib olduğu istedadı onun harada yaşaması ilə müəyyən olunmaz. Düzdür, hər hansısa kənddə yaşayan şagird ola bilər ki, texnoloji avadanlıqdan və ya internet resurslarından uzaq olsun. Amma bu çətinliklər onun bacarığına az təsir edər. Çünki bilirik ki, ölkəmiz keçmiş dövrlərdə texnologiya olmadan da yetərincə alim, rəssam, bəstəkar yetişdirib. Deməli arzularımızı reallaşdırmaq sadəcə bizim əlimizdədir.

Hər insanın ilk müəllimi onun valideynləridir. Uşaqlara nə qədər nəsihət verməyə çalışsaq da, onlar, ilk növbədə, gördüklərini edərlər.

Mən də hər uşaq kimi kiçik yaşlarımdan anamın etdiklərinə diqqət yetirmişəm. Anamın ixtisasına, işinə olan sevgisi daim diqqətimdə olub. Elə düşünmüşəm ki, deməli, insan müəllim olsa, məhz anam kimi xoşbəxt olar.

Orta məktəbdə müəllimlərimdən gördüyüm qayğı və sevgi də bunu bir daha sübut edib və mən kiçik yaşlarımdan qərara aldım ki, məhz müəllim olacağam. Bunun üçün də çox çalışdım.

Hər nə qədər müəllimlik peşəsinin çətin, məsuliyyətli iş olduğunu desələr də mən bu ixtisası seçdiyimə görə özümü çox şanslı hiss edirəm. Axı mənim işim dünyanın ən gözəl işidir.

Gələcəkdə müəllim olmaq istəyən abituriyentlərə də məsləhətim odur ki, əgər hansısa ağ vərəqləri rəngləmək istəyirsinizsə, sizə müəllim olmağı tövsiyə edirəm. Hərdən evdə problemləriniz olacaq, nəyəsə kədərləndiyiniz olacaq. Ancaq məktəbə gəlib şagirdlərinizin gülən üzlərini gördükcə bütün dərdləri unudacaqsınız. Elə bir ixtisasa sahib olacaqsınız ki, dünyada heç kəs sizin əməyinizə dəyər verə bilməyəcək. Və əsası hər gün özünüz də öyrənərək öyrədəcəksiniz.