Gənc Müəllim Danışır - Elvira Allahverdiyeva

"Gənc Müəllim Danışır" rubrikamızın növbəti qonağı Elvira Allahverdiyevadır.

Mən - Allahverdiyeva Elvira Fəyyaz qızı 2010-cu ildə Bakı Dövlət Universitetinin Filologiya fakültəsini bitirmişəm. Elə həmin ildə Sabirabad şəhər N.Nərimanov adına 2 saylı Beynəlmiləl Təbiət və texniki fənlər təmayüllü məktəb-liseydə Azərbaycan dili və Ədəbiyyat müəllimi olaraq pedaqoji fəaliyyətimə başlamışam.
Bu günə qədər bir çox təlimlərdə, elmi konfranslarda, seminarlarda, tədbirlərdə fəal iştirak etmişəm. Bunlardan “Ümumi təhsil müəssisələrində dərs deyən müəllimlər üçün İKT savadlılığının artırılması”, ”PİSA Beynəlxalq Qiymətləndirmə”, ”Yazı işinin təşkili metodikası”, "Tədris prosesində interaktiv proqramlardan və internet xidmələrindən istifadə”, Azərbaycan Təhsil Nazirliyi və Koreya Future Class Network şirkətinin KOİCA ilə təşkil etdiyi “Azərbaycan müəllimlərinin səriştəsinin artırılması” təlimlərində iştirak edərək sertifikatlarla təltif olunmuşam. Sabirabad Rayon Təhsil Şöbəsi tərəfindən 2020-2021-ci tədris ili ərzində müəllim və şagird münasibətlərinin düzgün qurulmasında, şagirdlərin təhsilə marağının artmasında fəal iştirak etdiyim üçün “Tərifnamə” ilə təltif edilmişəm.

Hal-hazırda e-Twinningdə “Rebuslarla əylənərək öyrənirik” layihəsində türkiyəli həmkarlarımızla iştirak edirik. Şagirdlərim olduqca həvəslə və yaradıcı şəkildə layihədə iştirak edirlər.

Dərslərimizi aşağı siniflərdə daha çox oyunəsaslı dərs şəklində təşkil edirəm ki, uşaqlar üçün maraqlı şəkildə dərs qurulduqda öyrənmə də daimi olur. Dərsimi Tap görüm, Blum kubu, Dairə üzrə hərəkət, Rollu oyun, Auksion və b. təlim üsulları ilə daha əyləncəli edirəm.

Ədəbiyyat müəllimi kimi şagirdlərə vətənpərvərlik hissini aşılamaq ən ümdə vəzifəmdir. Bu baxımdan ən yaddaqalan dərsim “Zəfər günü”nə həsr etdiyim dərs olmuşdur. Bundan əlavə İ. Nəsimi, N. Gəncəvi və A. Ələsgərin yubileyi münasibəti ilə şagirdlərimlə yaddaqalan tədbirlər təşkil etmişik. Ana Dili Günü münasibətilə 6-cı sinif şagirdlərimlə maraqlı dərs keçirmişdik.

Dünya durmadan dəyişir və inkişaf edir. Bu dəyişən dünyada şagirdləri keçmiş ənənələr əsasında deyil, gələcək zaman üçün hazirlamalıyıq. Uşaqlara yaradıcı yanaşmanı, tənqidi düşüncəni, problem həlletmə bacarığını, öz düşüncələrinin məhsulunu ortaya qoymağı öyrətməliyik. Bu baxımdan H. Qardnerin “Çoxnövlü intellekt” nəzəriyyəsi, D. Qoulman “Emosional zəka nəzəriyyəsi”, K. Dvek “Düşüncə tərzi” nəzəriyyəsinin məhz şagirdlərə fərdi yanaşmaq və onların potensialını üzə çıxarmaqda təlimdə tətbiqi olduqca əhəmiyyətlidir. Uşaqlarda mütaliəyə həvəs yaratmaq üçün kitabxanada sinifdənxaric oxu dərsləri təşkil edir və həftə üzrə ən çox bədii əsər oxuyan şagirdlərə diplom tərtib edirəm. Diplomları özüm dizayn etdiyim üçün onlarda daha da maraq yaranır.

Qarşılaşdığım ən istedadlı şagirdlərdən hazırda 11-ci sinifdə oxuyan Cəfərli Hüseyin Mətləb oğlunun adını çəkmək istəyirəm. Onun məntiqi-riyazi intellekti olduqca yüksəkdir və bu il Kimya fənni üzrə Olimpiadanın Respublika mərhələsinə keçib. Bundan başqa, N. Sadıqova, T. Zeynalova, E. Süleymanova, N.Nəsirli kimi şagirdlərim “Düşünən oxucu” müsabiqəsində məktəbimizi uğurla təmsil etmişdir. Heç vaxt unutmayacağım şagirdim isə bir vaxtlar parta arxasında əyləşən Vətən oğlu Şəhid Elgiz Abbaslıdır. Fəxr edirəm ki, bir qəhrəmanın müəllimi olmuşam.

Rayon məktəbində müasir təlim texnologiyalarının tətbiqində çətinliyimiz var. Elektron lövhə, proyektorla təmin olunmaq istərdik. STEAM təlimlərinin təşkilini, Veb 2 alətlərdən istifadə təlimlərinin məktəblərdə təşkilini və müəllimlərimizin faydalanmasını istərdim.

Mən kənd məktəbində təhsil almışam. Elmin kənd və şəhər deyə ayrıcalığı yoxdur. Yetər ki hədəflər dəqiq, məqsədlər aydın olsun. Bu gün kənd uşaqları təbiətlə daha yaxındır bu baxımdan şəhərdəki uşaqlardan üstündürlər. Şəhər uşaqlarının üstünlüyü muzeylərə, teatr tamaşalarına getmək imkanlarının olmasındadır. Bu da dünyagörüşlərinin inkişafına təsir edir. Texnologiyadan istifadə baxımından da çətinliklərimiz var.

Ən istedadlı, ən bacarıqlı uşaqlar gələcəkdə müəllim olmalıdır. Ən vicdanlı, ən ədalətli insanlar müəllim olmalıdır ki, dünyamıza sevgi dolu, pozitiv və gözəl düşünərək gözəl düşündürən fərdlər yetişdirsin.

Siz də müəllimlik hekayənizi, bu peşəni necə seçdiyinizi və müəllim olmağa necə qərar verdiyinizi bizimlə bölüşə bilərsiniz.